«Մեր ձևով» շարժման համակարգող Նարեկ Կարապետյանը հայտարարել է, որ իշխանությունների՝ ութ քահանաների ձերբակալելու փաստն ուղիղ կապ ունի Ադրբեջանից արված հայտարարությունների հետ։
«Տաշիր» ընկերությունների խմբի նախագահ, բարերար Սամվել Կարապետյանի կալանքի երկարաձգման միջնորդության քննության ժամանակ դատարանի բակում նա ասել է, որ թեև իշխանություններն իրենց գործողությունները բնութագրում են որպես կաթողիկոսի դեմ արշավ, սակայն ձերբակալությունները ցույց են տալիս, որ պայքարը եկեղեցու դեմ է։
«Դա հեքիաթ է, իրենք պայքարում են Հայ Առաքելական եկեղեցու դեմ, հայրենակիցնե՛ր ջան, այս իրենց հեքիաթներին մի հավատացեք, չորս օր առաջ էլի Ադրբեջանի հոգևոր առաջնորդը հայտարարություն է անում, որ Առաքելական եկեղեցին վտանգ է, չորս օր հետո էլի ութ հոգու ձերբակալում են, էլ ո՞նց մենք այդ մեսիջը ձեզ տանք, ձեզ մոլորեցնում են»,- շեշտել է Կարապետյանը։
Ըստ նրա՝ կա փաստ և այդ փաստին նախորդած իրադարձություն՝ Ադրբեջանի հոգևոր առաջնորդի ամեն հայտարարությունից մի քանի օր հետո տեղի է ունենում այսպիսի մի դեպք։
«Այս մարդիկ ոչ թե հոգևոր հովվին են թիրախավորել, թիրախավորել են Հայաստանի ամենամեծ վարկանիշ ունեցող կառույցին, հայ ժողովրդի համար միավորող ուժին, սփյուռքի հետ միավորող ուժին, որպեսզի հնարավորության դեպքում կարողանան հակազդել հայկական պահանջատիրությանը ցեղասպանության ուղղությամբ։ Այսինքն, որպեսզի ցեղասպանության հետ կապված մեր ազգի բոլոր պահանջները հնարավոր լինի ինչ-որ ձևով Հայաստանում արդեն չեզոքացնել այս ամեն ինչով»,- պարզաբանել է Կարապետյանը։
Հոկտեմբերի 15-ին Մայր Աթոռի տեղեկատվական համակարգից Armenia Today-ին հայտնել էին Արագածոտնի թեմի մի շարք հոգևորականների և թեմի առաջնորդ Մկրտիչ եպիսկոպոս Պռոշյանի տան խուզարկության, այնուհետ նրանց բերման ենթարկելու մասին։ Փաստաբան Արա Զոհրաբյանի տվյալներով՝ ժամը 12։30-ի դրությամբ բերման ենթարկվածների թիվը 7-ն է, նրանց թվում է նաև թեմի առաջնորդը, ում գտնվելու վայրը, փաստաբանի խոսքով, հայտնի չէ։ Արագածոտնի թեմի առաջնորդը կաթողիկոս Գարեգին 2-րդի քրոջ որդին է։
Սեպտեմբերի 1-ին Տեր Արամը Ֆեյսբուքի իր էջում գրառում էր կատարել՝ խոսելով եկեղեցու ներսում առկա խնդիրների մասին։ Սեպտեմբերի 2-ին տեղեկացրել էր, որ սպառնալից ակնարկներով փորձել են իրեն լռեցնել։ Սեպտեմբերի 10-ին վարչապետ Նիկոլ Փաշինյանը հայտարարել էր, որ պատրաստ է կանգնել Տեր Արամի և եկեղեցու խնդիրները վեր հանող հոգևորականների թիկունքին։ Սեպտեմբերի 12-ին Արագածոտնի թեմը հայտնել էր քահանային կարգապահական նկատողություն հայտարարելու մասին, սեպտեմբերի 17-ին՝ կեղծ որակել հարցազրույցում նրա հնչեցրած հայտարարությունները։
