«Տաշիր» ընկերությունների խմբի նախագահ Սամվել Կարապետյանը մշտապես իր օգտակարությունն է բերել ի շահ Հայ եկեղեցուն և հայոց աշխարհի, ի աջակցություն կալանավորված բարերարի, գործարարին աջակցող երթի մեկնարկից առաջ ելույթում հայտարարել է Գևորգ եպիսկոպոսը:
«Կարապետյանն այսօր հայտնվել է անազատության մեջ, որովհետև դեմ է ելել Հայ եկեղեցու նկատմամբ ապօրինություններին»,- ասել է նա:
Եպիսկոպոսը ցավով նշել է, որ այս օրերին իշխանության կողմից թիրախավորում են Հայ Առաքելական եկեղեցին, ողջ հոգևոր դասը, անգամ Ամենայն Հայոց կաթողիկոսը:
«Վերստին հաստատում ենք, որ այս ամենը հակասահմանադրական է, հակասում է եկեղեցի-պետություն օրենքին, քրիստենեական և հայ եկեղեցու կանոնադրությանը»,- հավելել է նա:
Գևորգ եպիսկոպոսը հայ եկեղեցու դեմ իշխանությունների հայտարարություններն ու գործողություններն անվանել է «հալածանք»:
«Եկեղեցու թիրախավորումը, միանշանակ, թուլացնելու է մեր պետականության հիմքերը»,- նշել է Գևորգ եպիսկոպոսը:
«Տաշիր» ընկերությունների խմբի առաջին փոխնախագահ Նարեկ Կարապետյանը հուլիսի 1-ին հայտարարել էր Երևանում երթի մասին՝ երկրում տիրող անարդարության և անօրինականության դեմ բողոքի ակցիայի շրջանակներում:
Հունիսի 19-ին դատարանը երկու ամսով կալանավորել էր «Տաշիր» ընկերությունների խմբի նախագահ Սամվել Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
