Ռուսաստանի շահերին վնասելը չկա և չի լինելու մեր օրակարգում, Հանրային հեռուստատեսության եթերում հայտարարել է վարչապետ Նիկոլ Փաշինյանը։
«Մեր բոլոր գործընկերների հետ կիսում ենք հետևյալ միտքը, որ Ռուսաստանին, Ռուսաստանի շահերին վնասելը չի եղել, չկա և չի լինելու մեր օրակարգում։ Դա բացառված է: Որևէ մեկը մեզ չի կարողանալու ներքաշել Ռուսաստանի դեմ գործելու տրամաբանության մեջ»,- հայտարարել է նա։
Փաշինյանի խոսքով՝ ռուս գործընկերների հետ շփումներում հայկական կողմը նույնպես նշում է, որ մտադիր չէ վիճել կամ լեզվակռվի մեջ մտնել, քանի որ գնահատում է առկա հարաբերությունները։ Նա նաև նշել է անձնական շփումների կարևորությունը՝ ընդգծելով, որ «ուղիղ և ջերմ հարաբերություններ» ունի Ռուսաստանի նախագահ Վլադիմիր Պուտինի և վարչապետ Միխայիլ Միշուստինի հետ։
«Սա մեր ռազմավարությունն է, մենք չենք գործելու Ռուսաստանի դեմ, բայց միշտ գործելու ենք՝ հանուն Հայաստանի Հանրապետության շահի»,- ասել է Փաշինյանը։
Վարչապետը նշել է, որ վաշինգտոնյան համաձայնագրերից հետո Ռուսաստանը հարցեր ուներ, և հայկական կողմը պատասխանել է դրանց։
Նրա խոսքով՝ հայկական կողմը ռուս գործընկերների ուշադրությունը հրավիրել է այն փաստի վրա, որ Երևանը շուրջ հինգ տարի Մոսկվային առաջարկել է Վաշինգտոնի համաձայնագրերում նշվածներին նման պայմաններ։ Փաշինյանը հայտարարել է, որ հայկական կողմը պատրաստ է Ռուսաստանի Դաշնության հետ համաձայնագրեր կնքել, եթե համաձայնագրում ներառվեն տարածքային ամբողջականության, ինքնիշխանության, իրավասության, փոխադարձության և սահմանների անձեռնմխելիության վերաբերյալ դրույթներ։
Նա նաև մեկնաբանել է հնարավոր այլընտրանքային լուծումները Ռուսաստանի կողմից երկաթուղու հատվածների վերանորոգումից հրաժարվելու կամ ուշանալու դեպքում՝ հաղորդակցությունների ապաշրջափակման շրջանակներում։ Փաշինյանը հիշեցրել է, որ հայկական կողմը դիմել է իր ռուս գործընկերներին երկաթուղու վերականգնման հարցով և, ըստ նրա, Երևանը դրական քաղաքական արձագանք է ստացել։ Վարչապետը նշել է, որ տարածաշրջանում ներկայումս կան երկու մրցակցող երկաթուղային երթուղիներ։
Թուրքիան և Ադրբեջանը հայտարարել են Նախիջևանից մինչև Կարս երկաթուղի կառուցելու նախագծի մասին՝ Կարս-Դիլուջու երթուղով։ Հայկական կողմն ակնկալում է, որ միջազգային երթուղին կգործի Երասխ-Ախուրիկ երթուղով, որտեղ կա գործող երկաթուղի, մանրամասնել է վարչապետը։ Երասխում մի քանի կիլոմետր երկաթուղի բացակայում է, իսկ Ախուրիկում՝ նույնիսկ ավելի քիչ, հավելել է նա։
«Եվ հիմա պետք է կենտրոնանանք մեր մրցակցային առավելությունների վրա։ Այստեղ տեսնում ենք, որ միջազգային համատեքստում այն փաստը, որ երկաթուղու այդ հատվածը գտնվում է Ռուսաստանի կառավարման ներքո, օգտագործվում է Կարս-Դիլիջու երթուղին ավելի նպաստավոր ներկայացնելու համար, և սա մեզ համար խնդիր է»,- հայտարարել է նա։
Վարչապետի խոսքով՝ լարված միջազգային իրավիճակում երկաթուղու այս հատվածի՝ Ռուսաստանի երկաթուղիների վերահսկողության տակ գտնվելու փաստը հանգեցնում է հայկական կողմի մրցակցային առավելության կորստին։ Փաշինյանը հայտարարել է այս իրավիճակը «բարեկամական, եղբայրական տրամաբանության մեջ» լուծելու անհրաժեշտության մասին՝ հավելելով, որ դա վերաբերում է Հայաստանի ռազմավարական, երկարաժամկետ շահերին։
«Մեր բոլոր բարեկամ երկրները պետք է շահագրգռված լինեն, որ մեր շահերն սպասարկվեն և ոչ թե հակառակը՝ մեր շահերը հայտնվեն փակուղու մեջ»,- ընդգծել է նա։
Կառավարության ղեկավարը նաև ասել է, որ Երասխ-Ախուրիկ երթուղու առավելությունների և այնտեղ երկաթուղու առկայության հարցը բարձրացրել է Թուրքիայի և Ադրբեջանի ղեկավարների հետ բանակցությունների ժամանակ, որին նրանք պատասխանել են «դիվանագիտական լռությամբ»։
Մանրամասները՝ տեսանյութում։
