Վրաստանում բանտից ազատել են իսրայելցի Սայմոն Լևաևին՝ հայտնի որպես «Tinder խաբեբա», հայտնում է Sputnik Gruzia-ն:
Նա ազատ է արձակվել, երբ Գերմանիան հետ է կանչել արտահանձնման խնդրանքը, հայտարարել է նրա փաստաբան Մարիամ Կուբլաշվիլին: Լևաևը երկու ամիս անցկացրել է Քութայիսի բանտում։
Նա լայն ճանաչում էր ձեռք բերել 2022 թվականին Netflix-ում «Tinder խաբեբա» վավերագրական ֆիլմի թողարկումից հետո: Այն պատմում էր, թե ինչպես է նա Tinder ծանոթությունների հավելվածի միջոցով հանդիպել կանանց, ներկայացել որպես հարուստ գործարար և նրանցից մեծ գումարներ շորթել՝ այդ գումարը ծախսելով ուրիշներին սիրահետելու վրա: Նա ներկայացել է որպես իսրայելցի միլիարդատեր և ադամանդի մագնատ Լև Լևաևի որդի, և իր էջը զարդարել մասնավոր ինքնաթիռների և զբոսանավերի լուսանկարներով:
Ֆիլմի ստեղծողները նրա գործողություններից պատճառված վնասը գնահատել էին մոտ 10 միլիոն դոլար: 2019 թվականին Լևաևը ձերբակալվել էր Հունաստանում՝ կեղծ փաստաթղթեր օգտագործելու համար, որից հետո արտահանձնվել էր Իսրայելին և դատապարտվել 15 ամսվա ազատազրկման խարդախության համար:
Հինգ ամիս անց նա վաղաժամկետ ազատ էր արձակվել համավարակի դեմ պայքարի ծրագրի շրջանակներում։ 2024 թվականին Թել Ավիվի դատարանը նրան պարտավորեցրել էր ավելի քան 100 հազար եվրո փոխհատուցում վճարել իսրայելցի Քեյթ Քոնլինին, որը պնդում էր, որ Լևաևն իրեն բարոյական և ֆիզիկական վնաս է պատճառել, ինչպես նաև ստիպել էր վարկեր վերցնել, որոնք նա չի մարել։
