«Ուժեղ Հայաստան» կուսակցության վարչապետի թեկնածու Սամվել Կարապետյանի պաշտպանները պատրաստ են 400 մլն դրամով ավելացնել 4 մլրդ կիրառված գրավը՝ տնային կալանքը վերացնելու համար։ Կարապետյանի գործով դատական նիստը և զուգահեռ ակցիան հեռարձակվում են Armenia Today-ի Youtube-ի ալիքում։
Փաստաբան Արամ Վարդևանյանը դատարանում ընդգծել է, որ 10 ամսվա ընթացքում Կարապետյանը դրսևորել է բացառապես պատշաճ վարքագիծ։ Նրա խոսքով՝ խափանման միջոցի հարցն առանցքային նշանակություն ունի Կարապետյանի՝ քաղաքական գործընթացներին մասնակցության համատեքստում: Փաստաբանը հավելել է՝ «ամեն ժամը կարևոր է»։
Վարդևանյանը հիշեցրել է, որ գործը քննող դատավոր Վահե Դոլմազյանը նախաքննության փուլում հիմնավոր կասկած չէր տեսել գործի նյութերում, այդ թվում՝ տնտեսական բնույթի դրվագներով։ Նա նշել է, որ նույն դատավորը Կարապետյանի նկատմամբ որպես խափանման միջոց էր ընտրել տնային կալանքը։
Ըստ նրա՝ նախկինում կալանքը երկարաձգելու միջնորդության քննության ժամանակ դատարանը նույնպես բավարար հիմքեր չէր տեսել ներկայացված մեղադրանքների մի մասով։
«Ինչպե՞ս կարող է բացառապես պատշաճ վարքագիծ դրսևորած և դրական բնութագրվող անձի նկատմամբ խափանման միջոցը լինել ինտենսիվ և պահպանվել 10 ամիս շարունակ»,- հայտարարել է փաստաբանը։
Վարդևանյանը դատարանում հայտարարել է, որ իր պաշտպանյալին առաջադրված մեղադրանքում բացակայում է «հիմնավոր կասկածը», ինչն արդեն իսկ արձանագրվել է դատական ակտով։ Փաստաբանի խոսքով՝ թեև մեղադրական եզրակացության մեջ նշված են որոշակի պնդումներ, դրանք հաստատող փաստական տվյալներ առկա չեն։
«Մեղադրող դատախազը չի բողոքարկել մարտի 14-ի այն դատական ակտը, որտեղ հստակ գրվել է, որ հիմնավոր կասկածը բացակայում է։ Սա ամենաթարմ տվյալն է այս դրվագի վերաբերյալ»,- նշել է Վարդևանյանը։
Պաշտպան Արշակ Վարդանյանը դատարանում հայտարարել է, որ իր պաշտպանյալի նկատմամբ իրականացվող գործողությունները հետապնդում են քաղաքական շահեր։
«Վստահեցնում եմ ձեզ՝ որևիցե կապ չկա և չի կարող լինել ներկայացված նյութերի և Կարապետյանի մեղադրանքի միջև»,- շեշտել է Վարդանյանը։
Նրա խոսքով՝ խափանման միջոց տնային կալանքի նպատակը Կարապետյանին մինչև ընտրություններ արգելանքի տակ պահելն է, որպեսզի նա չաջակցի եկեղեցուն, չլինի ընդդիմադիր ուժի առաջնորդ և հասարակության մեջ վախի մթնոլորտ ստեղծվի։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։ Նրա գործով դատավարությունը մեկնարկել էր ապրիլի 15-ին։
Փետրվարի 11-ին Կարապետյանը միաձայն ընտրվել էր «Ուժեղ Հայաստան» կուսակցության նախագահ: Դատարանը մարտի 14-ին ևս մեկ ամսով երկարաձգել էր նրա տնային կալանքը: «Ուժեղ Հայաստանն» ավելի ուշ հրապարակել էր ընտրություններին մասնակցող առաջին 36 թեկնածուի անունները։
Թարմացված է՝ 17.04.2026 | 18։28
