Ադրբեջանի նախագահ Իլհամ Ալիևը վերահաստատել է իր պահանջը՝ ադրբեջանցիների վերաբնակեցման վերաբերյալ և հայկական տարածքն անվանել «Արևմտյան Ադրբեջան»: Նրա ուղերձը հնչել է Բաքվում անցկացվող «Մշակութային ժառանգություն և վերադարձի իրավունք» միջազգային համաժողովին, փոխանցում են ադրբեջանական ԶԼՄ-ները:
Ալիևը պնդում է, որ 1905-1907, 1918-1921, 1948-1953 և 1987-1991 թվականներին «հայերի՝ Ադրբեջանի նախնիների հողերում բնակեցումից» հետո ադրբեջանցիները «ենթարկվել են հարկադիր տեղահանման»։ Նա ընդգծել է, որ Բաքուն մտադիր է հասնել հայկական կողմի գործողությունների «միջազգային իրավական գնահատականի»։
Ալիևը հայտարարել է, որ Հայաստանը վնաս է հասցրել, այսպես կոչված, «Արևմտյան Ադրբեջանի» տարածքում գտնվող «ադրբեջանցիների ոչ նյութական մշակութային ժառանգությանը» և պահանջել է «վերականգնել ադրբեջանցիների հոգևոր և մշակութային ամբողջականությունը»։
Բաքուն ակտիվորեն առաջ է մղում «Արևմտյան Ադրբեջան» հասկացությունը, որը նա անվանում է ժամանակակից Հայաստանի տարածք։ Վերջին տարիներին Ադրբեջանի իշխանությունները պահանջում են պայմաններ ստեղծել մինչև 1980-ականների վերջը Հայաստանում ապրած ադրբեջանցիների «վերադարձի» համար։
Ալիևի այս հայտարարությունը հնչում է օկուպացված Արցախի մշակութային ժառանգությունը ոչնչացնելու՝ ադրբեջանցիների գործողությունների ֆոնին:
Հայկական կողմը բազմիցս հայտարարել է, որ Բաքվի կողմից «Արևմտյան Ադրբեջան» եզրույթի օգտագործումը ոտնձգություն է Հայաստանի տարածքային ամբողջականության նկատմամբ: Հունվարին այս մասին հայտարարել էր ՀՀ վարչապետ Նիկոլ Փաշինյանը, իսկ հունիսին Հայաստանի ԱԳՆ-ն ընդգծել էր, որ «Արևմտյան Ադրբեջան» տերմինը նշանակում է Բաքվի տարածքային նկրտումներ Հայաստանի ինքնիշխան տարածքի նկատմամբ:
Բաքվից վերջին տարիներին բազմիցս հայտարարել են Հայաստան «ադրբեջանցիների վերադարձի» անհրաժեշտության մասին, իսկ 2024 թվականի հոկտեմբերին Ադրբեջանի խորհրդարանում ստեղծվել էր «Արևմտյան Ադրբեջան վերադարձի» խումբ։ Նոյեմբերի 3-ին Ալիևը հայտարարել էր, որ հայերը չպետք է վախենան ադրբեջանցիների՝ Հայաստան տեղափոխվելուց։
