Արտաքին հետախուզական ծառայության հաղորդագրությունները երբեք անհիմն չեն լինում, «ՌԻԱ Նովոստիի» փոխանցմամբ՝ հայտարարել է ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը։
Նա այսպես է արձագանքել ՀՀ վարչապետ Նիկոլ Փաշինյանի պատասխանին, որը «բացարձակ անհեթեթություն» էր անվանել ՌԴ ԱՀԾ-ի հայտարարությունը, ըստ որի Հայաստանը ձգտում է հեռանալ Մոսկվայից և աջակցել Կիևին՝ ռուսական հացահատիկի փոխարեն ուկրաինական հացահատիկ գնելով։
Կրեմլը հույս ունի շարունակել երկկողմ համագործակցությունը Հայաստանի հետ, լրագրողներին ասել է Պեսկովը։
«Երկկողմ համագործակցության օրակարգում շատ հարցեր ունենք։ Հուսով ենք, որ այս համագործակցությունը կշարունակվի։ ՌԴ-ն շարունակում է զարգացնել համագործակցությունն ինչպես երկկողմ, այնպես էլ Երևանի հետ ինտեգրացիոն գործընթացների շրջանակներում։ Կշարունակենք դա անել»,- ասել է նա։
ՌԴ ԱՀԾ-ն հայտարարել էր, որ Հայաստանը, քաղաքական նկատառումներից ելնելով, ցանկանում է հրաժարվել ռուսական հացահատիկից՝ հօգուտ ուկրաինականի։
