Այս պահի դրությամբ՝ 6 հոգևորական գտնվում է Քննչական կոմիտեի ներսում, ՔԿ է տեղափոխվում նաև Համբարձում քահանա Դանիելյանը, ՔԿ-ի դիմաց լրագրողներին հայտնել է փաստաբան Մարինե Ֆարմանյանը։
Նա տեղեկացրել է, որ կոմիտեի ներսում գտնվող 6 հոգևորականները, նախնական տվյալներով, վկայի կարգավիճակով, բայց երկար ժամանակ արգելափակված են քննչական մարմնում։ Փաստաբանի խոսքով՝ նրանց շահերի պաշտպանության համար թղթային դիմում են փորձում ներկայացնել ՔԿ, բայց դեռ չի ստացվել այն մուտք անել, քանի որ ոստիկանները պատ են կազմել։
Փաստաբանը նշել է, որ շարունակում է անհայտ մնալ առավոտյան բերման ենթարկված, Արագածոտնի թեմի առաջնորդ Մկրտիչ եպիսկոպոս Պռոշյանի գտնվելու վայրը։ Փաստաբանի տվյալներով՝ անհայտ է նաև Նարեկ քահանա Սարգսյանի և Սարգիս քահանա Սարգսյանի գտնվելու վայրը, որոնց նույնպես տնից բերման են ենթարկել։
«Մկրտիչ սրբազանն ուղղակի անհետացել է, մեզանից թաքցվում է նրա գտնվեու վայրը»,- հավելել է փաստաբանը։
Հոկտեմբերի 15-ի առավոտյան Մայր Աթոռի տեղեկատվական համակարգից Armenia Today-ին հայտնել էին Արագածոտնի թեմի մի շարք հոգևորականների և թեմի առաջնորդի տան խուզարկության, այնուհետ նրանց բերման ենթարկելու մասին։ Ավելի ուշ ՔԿ-ից Armenia Today-ին մանրամասնել էին, որ կատարում են գործողություններ՝ հավաքի մասնակցելուն հարկադրելու հատկանիշներով նախաձեռնված քրեական վարույթի շրջանակում։
Քրվարույթը հարուցվել էր Հովհաննավանքի հոգևոր հովիվ Տեր Արամ քահանա Ասատրյանի՝ 2021-ին «ընդդիմության ցույցերին ստիպողաբար և հրահանգով մասնակցելու» վերաբերյալ հայտարարությունների հիման վրա, որի վերաբերյալ հաղորդում էր ներկայացրել Դանիել Իոաննիսյանի ղեկավարած «Իրազեկ քաղաքացիների միավորումը»։
Տեր Արամի՝ եկեղեցու ներսում առկա խնդիրների, այնուհետ իրեն լռեցնելու մասին գրառումներից հետո վարչապետ Նիկոլ Փաշինյանը հայտարարել էր, որ պատրաստ է կանգնել նրա և եկեղեցու խնդիրները վեր հանող հոգևորականների թիկունքին։ Սեպտեմբերի 12-ին Արագածոտնի թեմը հայտնել էր քահանային կարգապահական նկատողություն հայտարարելու մասին, սեպտեմբերի 17-ին՝ կեղծ որակել հարցազրույցում նրա հնչեցրած հայտարարությունները։
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
