«Վեոլիա Ջուր» ընկերությունը պետականացնելու կարիք չկա, ԱԺ տնտեսական հարցերի մշտական հանձնաժողովի արտահերթ նիստում, ուր քննարկում են «Հայաստանի էլեկտրական ցանցեր» ՓԲԸ-ն պետականացնելու նախագիծը, նշել է Տարածքային կառավարման և ենթակառուցվածքների նախարար Դավիթ Խուդաթյանը։
Նախարարն այդ մասին ընդգծել է՝ ի պատասխան հարցի, թե իշխանությունը ՀԷՑ-ը պետականացնելուն զուգահեռ չի՞ պատրաստվում պետականացնել նաև ֆրանսիական կապիտալով «Վեոլիա Ջուրը», որի աշխատանքից սպառողները գոհ չեն, և հաճախ ջրանջատումներ են տեղի ունենում։
Խուդաթյանն ընդգծել է, որ «Վեոլիա Ջրի» ամբողջ ենթակառուցվածքը պետական է, և ընկերությունն ընդամենը հավատարմագրային կառավարում է իրականացնում։
«Տաշիր» ընկերությունների խմբի նախագահ, ՀԷՑ-ի սեփականատեր Սամվել Կարապետյանին առնչվող գործողությունների ֆոնին՝ վարչապետ Նիկոլ Փաշինյանը հունիսի 18-ին հայտարարել էր, թե հասունացել է գործարարին պատկանող ընկերությունն ազգայնացնելու պահը, ապա հայտնել էր, որ պետականացման պլանը պատրաստ է։ «Քաղաքացիական պայմանագիր» խմբակցությունը հուլիսի 1-ին խորհրդարանում ներկայացրել էր ՀԷՑ-ին առնչվող օրինագիծը, որը, ըստ ընդդիմադիր պատգամավորների, ընկերությունը «խլելու» նպատակ ունի։
Կարապետյանի ընտանիքը հունիսի 30-ին ՀՀ պետական մարմիններին պաշտոնապես ծանուցել էր ներդրումային վեճ սկսելու մասին: ԱԺ-ն այսօր առաջին ընթերցմամբ ընդունել էր ՀԷՑ-ի պետականացմանը միտված նախագիծը։
Կարդացեք նաև
Սամվել Կարապետյանն արձագանքել է ՀԷՑ-ի բաժնետոմսերն ստանալու իշխանությունների ծրագրերի մասին լուրերին
ՀԷՑ-ի ղեկավարությունը պատմել է Երևանի էներգոհամակարգում ներդրումներ կատարելու ծրագրերի մասին
Սամվել Կարապետյանը խոսել է Երևանի կենտրոնում էլցանցի նոր համակարգ ստեղծելու ծրագրերի մասին
