«Քաղաքացիական պայմանագիր» խմբակցությունը խորհրդարանում ներկայացրել է «Հանրային ծառայությունները կարգավորող մարմնի մասին» օրենքում լրացում կատարելու մասին» և «Էներգետիկայի մասին» օրենքում լրացումներ ու փոփոխություն կատարելու մասին» օրենքների նախագծերի փաթեթը: Ընդդիմադիր պատգամավորները համոզված են, որ նախագիծը «Տաշիր» ընկերությունների խմբի կալանավորված նախագահ Սամվել Կարապետյանին պատկանող «ՀԷՑ-ը ոչ թե ազգայնացնելու, այլ խլելու» նպատակ ունի։
Տարածքային կառավարման և ենթակառուցվածքների փոխնախարար Արմեն Սիմոնյանն էներգետիկ ոլորտում առաջարկվող օրենսդրական փոփոխությունները «ՀԷՑ-ը խլելու նախագիծ» չի անվանել, ինչին ընդդիմադիրները հակադարձել են։
«Թռնեք օդ, իջնեք ներքև, սա ՀԷՑ-ը խլելու նախագիծ է, որքան էլ փորձեք գեղեցիկ ձևակերպումներով փաթեթավորել այն»,- նշել է «Հայաստան» խմբակցության պատգամավոր Աննա Գրիգորյանը։
Նա փոխնախարարին կոչ է արել բացատրել, թե ինչու է կառավարությունն առաջարկել հարցը «հրատապ կերպով» քննարկել խորհրդարանում։ Պատգամավորի խոսքով՝ իշխանությունների շտապողականությունը պայմանավորված է նրանով, որ ՀԷՑ-ի սեփականատերն աջակցել էր Հայ Առաքելական եկեղեցուն։ Սիմոնյանը պատասխանել է, որ «ոլորտում բազմաթիվ խնդիրներ կան, որոնց մի օր պետք է հրատապ լուծում տալ»։
ՔՊ պատգամավոր, նախագծի հիմնական զեկուցող Վլադիմիր Վարդանյանը պարզաբանել է, որ նախագծի ընդունումը պետությանը էներգետիկ ոլորտում հնարավոր ռիսկերի դեպքում կարգարվորող գործառույթ ունենալ։ Նա պարզաբանել է, որ Հայաստանի էներգետիկայի բնագավառում գործունեության կարգավորումն իրականացվում է Հանրային ծառայությունները կարգավորող հանձնաժողովի կողմից «Էներգետիկայի մասին» օրենքով:
«Այս համատեքստում լիցենզավորված անձի նկատմամբ վարույթ հարուցվելու կամ նրա լիցենզիայի գործողությունը դադարեցնելու դեպքերում փաստացի չեն նախատեսվում այն երաշխիքները, որոնք կապահովեն նման դեպքերում կրիտիկական այս կարևոր ենթակառուցվածքների բնականոն ու անխափան գործունեության շարունակականությունը, ինչը կարող է հանգեցնել նաև սպառողների իրավունքների ու օրինական շահերի պաշտպանության խախտմանը»,- շեշտել է Վարդանյանը։
Նրա խոսքով՝ «երբ էներգետիկ ոլորտի կազմակերպած գործողությունները սպառնում են համակարգի կայունությանը, գործող օրենսդրությամբ չեն ապահովվում բավարար մեխանիզմներ կանխարգելիչ միջոցառումների համար»։
«Այսպիսի օրենսդրական բացը լի է լուրջ վտանգներով։ Նախատեսվող կանխարգելիչ միջոցառումների կիրառումը ենթադրում է, որ հանրային իշխանության մարմինները պետք է ունենան ժամանակին միջամտելու լիազորություններ, երբ վտանգը միայն դեռ հավանական է: Պետությունը պետք է ունենա արագ արձագանքման կառուցակարգեր, որ վտանգի բարձր հավանականության դեպքում գործադրվեն անհրաժեշտ գործընթացներ՝ կանխարգելիչ միջոցներ կիրառելու համար»,- հավելել է նա։
Վարդանյանը կարծում է՝ նախագիծը դեռ տարիներ առաջ պետք էր նեկայացնել, այն «ուշացած է»։
«Սեփականաշնորհման խուժան գործընթացին պետք էր ժամանակին ուշադիր լինել։ Պետք չէր պետություն մեջ պետություն կառուցել»,- նշել է հիմնական զեկուցողը։
«Հայաստան» խմբակցության քարտուղար Արծվիկ Մինասյանի կարծիքով՝ նախագծի ընդունման դեպքում ՀԾԿՀ նախագահը էներգետիկ ոլորտի մասնավոր սուբյեկտից կառավարումը խլելու միանձնյա որոշում կկայացնի։
«Նախագծի ընդունման դեպքում ՀԾԿՀ-ն պարտավորեցնելու է փոփոխություններ կատարել կանոնադրության մեջ, իրականացնել սեփականության վերաբաշխում, ինչն ապօրինի է»,- հայտարարել է Մինասյանը:
Վարդանյանը պատասխանել է, որ հանձնաժողովի նախագահը խախտումների դեպքում միայն վարույթ է հարուցում, իսկ վարույթի ճակատագիրը որոշում է ՀԾԿՀ-ն:
«Օպերատիվության տեսանկյունից, երբ անհրաժեշտ է իրավիճակից ելնելով արագ գործողություններ իրականացնել, անհրաժեշտ է միանձնյա որոշումներ կայացնել։ Ընդ որում, այդ որոշումներն, ըստ էության, միջանկյալ են։ Ասում եք՝ «խլել», բայց, կներեք, ժամանակավոր կառավարչի ինստիտուտն ընդունված պրակտիկա է, հատկապես այն դեպքերում, երբ լիցենզիայի հետ կապված խնդիրներ են առաջանում: Եթե խախտումներ են տեղի ունենում, և լիցենզիայից զրկելու թեմա է առաջանում, որևիցե արձագանք չպե՞տք է լինի պետական մարմնի կողմից»,- հավելել է Վարդանյանը։
Ընդդիմադիր պատգամավորները հիշեցրել են, որ «Բարձրավոլտ էլեկտրական ցանցեր» ընկերությունը գտնվում է պետության կառավարման ներքո, բայց խոշոր նախագծեր տարիներ շարունակ մնում են չիրականացված:
Ընկերության սեփականատեր Սամվել Կարապետյանի շուրջ գործողությունների ֆոնին՝ վարչապետ Նիկոլ Փաշինյանը հունիսի 18-ին հայտարարել էր, թե հասունացել է գործարարին պատկանող ՀԷՑ-ն ազգայնացնելու պահը: Սամվել Կարապետյանի ընտանիքը հունիսի 30-ին ՀՀ պետական մարմիններին պաշտոնապես ծանուցել էր ներդրումային վեճ սկսելու մասին:
