Մեծի Տանն Կիլիկիո կաթողիկոսությունը դատապարտել է ՀՀ իշխանությունների հարձակումն Էջմիածնի բարձրաստիճան հոգևորականների վրա և զորակցություն հայտնել Ամենայն Հայոց կաթողիկոսին:
Կաթողիկոսության ազգային կենտրոնական վարչության կրոնական ու քաղաքական ժողովը դատապարտել է եկեղեցական հարցերի հրապարակային քննարկման համար օգտագործված ոճը: Ժողովականները հիշեցրել են, որ Սահմանադրությանը հակասում են նման միջամտություններ կատարելով հարցերի արծարծումը:
«Եկեղեցուն և եկեղեցականներին վերաբերող հարցերը քննվում են եկեղեցական կանոնագրության համաձայն: Եկեղեցուն և եկեղեցականներին առնչված հարցերի գծով միջամտելու որևէ իրավական հիմք պետությունը չունի»,- ասվում է հայտարարության մեջ:
Նշվում է, որ հայրենիքի դիմագրաված գոյաբանական խնդիրներն ու նրա անվտանգությանն սպառնացող իրավիճակի պայմաններում անհրաժեշտ է նպատակաուղղված աշխատել հայրենիքի գոյությանն սպառնացող վտանգների դիմակայմանը՝ մերժելով նման բաժանարար ու պառակտիչ փորձերը:
Մայիսի 29-ին ՀՀ վարչապետ Նիկոլ Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել», ինչից հետո նրան քննադատել էին։ Ի պատասխան՝ մայիսի 30-ին մի շարք գրառումներով անդրադարձել էր հոգևորականներին ու նշել, որ պետությունը պետք է մասնակից լինի կաթողիկոսի ընտրություններին։ Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ։
Հունիսի 2-ին Փաշինյանը հայտարարել էր՝ «եթե պարզվի, որ Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը»։ Ավելի ուշ Գերագույն հոգևոր խորհուրդը կոչ էր արել կասեցնել «վարչապետի անօրինական և անհեռատես քաղաքականությունը»։ Հունիսի 9-ին վարչապետը կոչ էր արել համախմբվել նոր կաթողիկոսի ընտրության շուրջ՝ պնդելով, որ Գարեգին Երկրորդը զավակ ունի: Հունիսի 10-ի վաղ առավոտյան Փաշինյանն առաջարկել էր ստեղծել համակարգող խումբ՝ Սուրբ Էջմիածնի Վեհարանն ազատելու և կաթողիկոսական նոր ընտրությունների օրակարգի կազմակերպչական հարցերի համար։
Հունիսի 11-ին՝ կեսգիշերն անց, Ամենայն Հայոց կաթողիկոսն ԱՄԷ-ից վերադարձել էր Հայաստան, նրան դիմավորել էին քաղաքացիները: Գարեգին Բ-ն հայտարարել էր՝ վարչապետի հայտարարությունները համընդհանուր վրդովմունք են առաջացրել:
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
