Մայր Աթոռ Սուրբ Էջմիածնում տեղի ունեցած Գերագույն հոգևոր խորհրդի ժողովը դատապարտել է վարչապետ Նիկոլ Փաշինյանի կողմից վերջին օրերին «հրահրված հակաեկեղեցական արշավը»։
Հայտարարության մեջ նշվում է, որ վարչապետի կեցվածքն ակնհայտորեն թելադրված է քաղաքական նպատակներով և փորձ է նսեմացնելու ազգային կյանքում և միջազգային շրջանակներում հարգանք վայելող Հայոց եկեղեցու և եկեղեցականների հեղինակությունը, լռեցնելու եկեղեցու ձայնը և նվազեցնելու նրա հանրային ազդեցությունը։
Հոգևոր խորհուրդը հիշեցրել է, որ եկեղեցու հարցերը լուծվում են եկեղեցական կարգերի ու կանոնների համաձայն և դուրս են պետական և քաղաքական գործիչների իրավասությունից։
Խորհուրդն իրավասու պետական մարմիններին կոչ է արել կասեցնել վարչապետի այս անօրինական և անհեռատես քաղաքականությունը։
«Հարկ չկա եկեղեցին ներքաշելու արհեստական օրակարգերի մեջ և մղելու հակադարձման գործողությունների»,- շեշտել է խորհուրդը։
Նշվում է, որ եկեղեցու դեմ նախաձեռնած գործընթացները հղի են կործանարար հետևանքներով և սպառնալիք՝ հայոց պետականությանը ժողովրդի միաբանությանը թե՛ հայրենիքում և թե՛ սփյուռքում։ Շեշտվում է, որ այսպիսի գործողությունները պառակտում են հասարակությունը, տկարացնում ազգի ոգին և հայրենանվիրումի բարձր գիտակցությունը հատկապես առկա մարտահրավերների պայմաններում։
«Հայհոյախառն, անվայել խոսույթներով հախուռն հրապարակումները զուրկ են բարեկրթության տարրական նորմերից, ոտնահարում են մարդու հիմնարար իրավունքները, կոպտորեն վիրավորում հավատացյալների կրոնական զգացմունքները և սքողվում կեղծ սրտացավության հիմնավորումներով»,- ասվում է հայտարարության մեջ։
Ըստ հաղորդագրության՝ նման դատապարտելի ձեռնարկումներն սպասարկում են արտաքին հայատյաց ուժերի նկրտումները՝ որոշակիորեն կապակցվելով ադրբեջանական քարոզչամեքենայի կողմից հայ ժողովրդին և Հայ եկեղեցուն ուղղված զրպարտությունների և կեղծ մեղադրանքների հետ։
Մայր Աթոռը շեշտել է, որ գիտակից իր հանձնառություններին՝ անշեղորեն շարունակելու է հոգեփրկչական և ազգապահպան առաքելությունը՝ ընդդիմանալով ազգավնաս ու կործանարար ընթացքներին և մշտապես հետամուտ լինելով պետության ու ազգի գերակա շահերի, սրբազան արժեքների պաշտպանությանը։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել»։ Հաջորդ իսկ օրը՝ մայիսի 30-ի առավոտյան, վարչապետը մի շարք գրառումներով անդրադարձել էր հոգևորականների՝ իրեն ուղղված քննադատություններին, որոնք հնչել էին՝ նրա հայտարարություններին ի պատասխան։ Փաշինյանը ՀՀ իշխանություններին կոչ էր արել մասնակցել կաթողիկոսի ընտրություններին՝ պնդելով, որ Հայրապետության թեկնածուները պետք է բարեվարքության ստուգում անցնեն։
Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ՝ նշելով, որ նրանք, իբր, «չուլաններում կատարում են այլասերվածություններ և հավատավոր ժողովրդի ցասմանն անգամ չեն արժանանում»։ «Սրբազան պայքար» շարժման առաջնորդ, արքեպիսկոպոս Բագրատ Գալստանյանը Մայր Աթոռին կոչ էր արել դատական գործընթաց սկսել Փաշինյանի և նրա կնոջ կողմից հոգևորականների դեմ վիրավորական հրապարակումների կապակցությամբ։
Մայիսի 31-ին Մայր Աթոռը տեղեկացրել էր, որ կաթողիկոսը Շվեյցարիայում մասնակցում է «Կրոնական ազատություն․ հայկական հոգևոր, մշակութային և պատմական ժառանգության պահպանումն Արցախում» խորագրով միջազգային համաժողովին, որտեղ հանդես էր եկել ելույթով։
Հունիսի 2-ին Փաշինյանը հայտարարել էր՝ եթե պարզվի, որ Ամենայն Հայոց կաթողիկոս Գարեգին Բ-ն խախտել է կուսակրոնության ուխտը և զավակ ունի, նա չի կարող զբաղեցնել այդ պաշտոնը և կրել Վեհափառի կոչումը, որովհետև խնդրո առարկա փաստի առկայության պահից նա չէր կարող լինել կուսակրոն քահանա։
