Լոս Անջելեսի քաղաքապետ Քարեն Բասը քաղաքի կենտրոնական հատվածում պարետային ժամ է հայտարարել, քանի դեռ ԱՄՆ ներգաղթի և մաքսային ծառայության դեմ բողոքները շարունակվում են, գրում է CBSnews-ը։
Պարետային ժամը կսկսվի այս գիշեր՝ ժամը 20:00-ին (ԱՄՆ տեղական ժամանակով) և կշարունակվի մինչև չորեքշաբթի առավոտյան 06:00-ն՝ ընդգրկելով կենտրոնի մեկ քառակուսի մղոն տարածք։
«Սա արվում է վանդալիզմը և թալանը դադարեցնելու համար։ Եթե դուք Լոս Անջելեսի կենտրոնում չեք բնակվում կամ աշխատում, խուսափեք այդ տարածքից»,- մամուլի ասուլիսի ժամանակ ասել է Բասը՝ հավելելով, որ իրավապահները կարող են ձերբակալել պարետային ժամը խախտողներին և նրանց նկատմամբ հարուցել քրեական գործ։
Ցուցարարները վերջին հինգ օրերի ընթացքում (հունիսի 6-11-ը ներառյալ) գրավել են կենտրոնի մի շարք փողոցներ։ Որոշ պահերի բախումները վերածվել են լուրջ առճակատման՝ հանգեցնելով մոտ 469 ձերբակալությունների:
Նահանգներում բախումներ են տեղի ունենում իրավապահների և ցուցարարների միջև: ԱՄՆ նախագահ Դոնալդ Թրամփի հրամանով՝ շուրջ 300 ազգային գվարդիացի հունիսի 8-ից տեղակայվել է Լոս Անջելեսի տարածքում՝ դաշնային անձնակազմի և գույքի պաշտպանությունն ապահովելու նպատակով։
Մայիսի 30-ին ԱՄՆ Գերագույն դատարանը Թրամփին թույլատրել էր արտաքսել 500 000 ներգաղթյալի։ Հայաստանի շուրջ 2808 քաղաքացի երկրում ապօրինի ներգաղթյալների դեմ Թրամփի քաղաքականության շրջանակներում կարտաքսվի ԱՄՆ-ից։ 2024 թվականի նոյեմբերի 24-ի դրությամբ՝ ԱՄՆ-ում ավելի քան 1,4 միլիոն ոչ ռեզիդենտ անձ էր հաշվառվել։ Այս ցուցակը գլխավորում են Մեքսիկան և Սալվադորը՝ համապատասխանաբար ավելի քան 252 000 և 203 000 դեպքերով:
