Միլիարդատեր Իլոն Մասկը քննադատել է ԱՄՆ նախագահ Դոնալդ Թրամփի օրինագիծը, որը նախատեսում է էական հարկային արտոնություններ։ Նա գրել Է KILL the BILL՝ նմանեցնելով «Սպանել Բիլլին» ֆիլմի վերնագրին։
Նա նաև «զզվելի էր» անվանել Թրամփի «մեծ ու գեղեցիկ» օրինագիծը։
«Թրամփի առաջարկած հարկաբյուջետային օրինագիծը կավելացնի «բյուջեի առանց այն էլ հսկայական դեֆիցիտը մինչև 2,5 տրիլիոն դոլար ևծանրաբեռնի Ամերիկայի քաղաքացիներին ճնշող պարտքով»,- X-ում գրել է Մասկը:
Նախաձեռնությունը քննադատել են նաև Նոբելյան մրցանակակիրներ։
Մասկը նախկինում ասել էր, որ նախագիծը խաթարում է պետական կառավարման արդյունավետության վարչության (DOGE) աշխատանքը, որը նա անձամբ էր վերահսկում:
Թրամփի տնտեսական օրինագիծը, որն իրականացնում է նրա նախընտրական խոստումները, պաշտոնապես կոչվում է One Big Beautiful Bill (Մեկ մեծ, գեղեցիկ օրինագիծ): Այս փաստաթուղթը երկարացնում է 2017-ին Հանրապետականների կողմից սահմանված հարկային արտոնությունները, վերացնում է թեյավճարների և արտաժամյա աշխատանքի վճարման հարկերը, ավելացնում է պետական պարտքի շեմը մինչև 4 տրիլիոն դոլար, ավտովարկերի տոկոսների վճարման հարկային արտոնությունները և այլն:
Միևնույն ժամանակ, այն նվազեցնում է սոցիալական պաշտպանության ծրագրերի ծախսերը, ինչպիսիք են Medicaid-ը (ցածր եկամուտ ունեցող և հաշմանդամ քաղաքացիների առողջության ապահովագրության ծրագիր): Մայիսին նախագիծն ընդունել էր Ներկայացուցիչների պալատը, այժմ այն քննարկում է Սենատը։
Մայիսի 29-ին հայտնի է դարձել, որ Մասկը լքում է ԱՄՆ նախագահի վարչակազմը՝ իր ծախսերի կրճատման բարեփոխումների ձախողման և նախագահի հետ ունեցած տարաձայնությունների պատճառով։ Մասկն ընդգծել էր, որ ցանկանում է կենտրոնանալ իր բիզնեսի վրա, որն սկսել է մեծ վնասներ կրել միլիարդատիրոջ քաղաքական ակտիվության հետևանքով։
