Հայաստանում Ռուսաստանի դեսպան Սերգեյ Կոպիրկինը բաց նամակ է հղել ՀՀ պաշտպանության նախարար Սուրեն Պապիկյանին, որում «կեղծ և սրբապիղծ» է անվանել ՊՆ նախկին խոսնակ Արծրուն Հովհաննիսյանի՝ մայիսի 9-ին Հաղթանակի օրվա վերաբերյալ հայտարարությունները:
Հովհաննիսյանը մայիսի 9-ին Հանրային հեռուստատեսության եթերում ասել էր, որ Երկրորդ համաշխարհային պատերազմում իրական հաղթողն Արևմուտքն էր՝ ԱՄՆ-ի գլխավորությամբ, որը ոչ միայն հաղթել էր, այլև թույլ չէր տվել ԽՍՀՄ-ին օկուպացնել այն տարածքները, որոնց նկատմամբ հավակնում էր խորհրդային ղեկավարությունը։ Հովհաննիսյանը նաև ընդգծել էր, որ Հայաստանի համար շատ ավելի լավ կլիներ, եթե Հիտլերը հաղթեր պատերազմում, իսկ Հաղթանակի օրը մայիսի 9-ին նշելը «միֆ» էր անվանել։
Կոպիրկինը շեշտել է, որ Հովհաննիսյաանը փորձել է պղծել հերոսական այն նախնիների հիշատակը, որոնք թույլ չեն տվել իրականացնել ԽՍՀՄ ժողովուրդների ստրկացման և ոչնչացման հիտլերյան ծրագրերը, փրկել են մարդկությանը «շագանակագույն ժանտախտից»։
«Հաղթանակի տոնի նկատմամբ հայ ժողովրդի խոր հարգանքի ֆոնին լայն վրդովմունք են առաջացրել ՀՀ ՊՆ նախկին խոսնակի՝ պատմականորեն կեղծ և սրբապիղծ հայտարարությունները՝ հիտլերյան Գերմանիայի ագրեսիան փաստացի արդարացնելու վերաբերյալ, որոնք նա հնչեցրել էր այդ սուրբ օրը երկրի գլխավոր հեռուստաալիքով։ Հատկապես ցավալի էր նման արտահայտություններ լսել մի մարդու շուրթերից, որն այժմ ղեկավարում է ՀՀ ՊՆ ռազմական ակադեմիայի հրամանատարաշտաբային ինստիտուտը՝ Հայրենական մեծ պատերազմի փառապանծ զորավար, Խորհրդային Միության կրկնակի հերոս, մարշալ Հովհաննես Բաղրամյանի անունը»,- ընդգծել է դեսպանը։
Կոպիրկինը, միևնույն ժամանակ, Պապիկյանին ուղղված նամակում նրան շնորհավորել է Հայրենական մեծ պատերազմում տարած հաղթանակի 80-ամյակի կապակցությամբ և նշել, որ մայիսի 9-ին Հայաստանում տեղի ունեցած հոբելյանական միջոցառումները ժողովրդական լայն աջակցություն են ստացել։
«Հանրապետության բնակիչները, ինչպես ավագ, այնպես էլ երիտասարդ սերնդի, սրտի կանչով եկել են զինվորական հուշակոթողներ՝ հարգելու հայրենիքը պաշտպանելու մեկնած 600 հազար հայերի հիշատակը, որոնցից 300 հազարը տուն չի վերադարձել»,- հավելել է դեսպանը։
