Վրաստանի վարչապետ Իրակլի Կոբախիձեն բաց նամակով դիմել է ԱՄՆ նախագահ Դոնալդ Թրամփին և փոխնախագահ Ջեյ Դի Վենսին, տեղեկացնում է Ekhokavkaza-ն: Նամակում նա, մասնավորապես, վրաց-ամերիկյան հարաբերությունների «վերաթարմացման» հույս է հայտնել:
Կոբախիձեն, ում լեգիտիմությունը չի ճանաչում ընդդիմությունը, հայտնել է, որ մի քանի շաբաթ առաջ Թրամփին նամակ է ուղարկել երկկողմ հարաբերությունների հարցերով։
«Նամակին նախորդել են իմ հրապարակային հայտարարությունները, որոնցում բացահայտ հայտնել եմ Վրաստանի պատրաստակամությունը՝ ԱՄՆ-ի հետ սկսել նորացված ռազմավարական գործընկերություն՝ մաքուր էջից և հստակ «ճանապարհային քարտեզի» հիման վրա։ Սակայն մինչ օրս մենք պատասխան չենք ստացել ո՛չ այդ նամակին, ո՛չ էլ հրապարակային հայտարարություններին։ Ավելին՝ մինչ այժմ Վրաստանի և ԱՄՆ-ի կառավարությունների միջև չի կայացել ոչ մի բարձր մակարդակի շփում»,- նշել է Կոբախիձեն։
Քաղաքական գործիչն ընդգծել է, որ այս լռությունը «շփոթություն է առաջացնում վրաց ժողովրդի և իշխանությունների մոտ»:
Թբիլիսիում բողոքի ցույցեր են ընթանում 2024 թվականի նոյեմբերի 29-ից, երբ վարչապետ Կոբախիձեն հայտարարել էր, որ Թբիլիսին ԵՄ-ի հետ բանակցություններ սկսելու հարցը չի բարձրացնի մինչև 2028 թվականը։ 2024 թվականի դեկտեմբերի 27-ին ԱՄՆ-ն ֆինանսական պատժամիջոցներ էր կիրառել «Վրացական երազանքի» հիմնադիր Բիձինա Իվանիշվիլիի նկատմամբ հայտարարելով, որ գործարարի և իշխող կուսակցության գործողությունները քայքայել են ժողովրդավարական ինստիտուտները, թույլ են տվել ոտնահարել մարդու իրավունքները և զսպել հիմնարար ազատությունների իրականացումը Վրաստանում։ Ցույցերը շարունակվում են մինչ օրս։
