Ադրբեջանի նախագահ Իլհամ Ալիևը հայտնել է Արցախի օկուպացված Շուշի և Ստեփանակերտ քաղաքները կապող ճոպանուղու կառուցման մասին։ Տեղական լրատվամիջոցների հաղորդմամբ՝ այս մասին նա ասել է Ակնայում մուղամի կենտրոնի բացման ժամանակ։
Ալիևի խոսքով՝ ճոպանուղիներ կկառուցվեն նաև օկուպացված Բերձոր և Քարվաճառ քաղաքներում։ Նա նաև հայտարարել է, որ տարածաշրջանում իրենց հետ հաշվի չնստողները կզղջան դրա համար։ Ըստ Ադրբեջանի նախագահի՝ նույնիսկ իրենց «թշնամաբար վերաբերվող շրջանակները գիտեն, որ հարգանքի արժանի ժողովուրդ են, և պետք է հաշվի նստել» իրենց հետ։
2023 թվականի սեպտեմբերի 19-ին Ադրբեջանը հարձակվել էր Արցախի վրա։ Ռազմական գործողությունների ավարտից հետո Արցախի ողջ բնակչությունը բռնատեղահանվել էր։ Արցախից բռնի տեղահանված 100 632 քաղաքացի էր հասել ՀՀ։
Ադրբեջանի ռազմական ագրեսիայի հետևանքով, ՀՀ ՔԿ-ի տվյալներով, զոհվել էր ավելի քան 200, վիրավորվել՝ ավելի քան 300 մարդ, գերեվարվել՝ 16-ը, խոշտանգվել՝ 14-ը, անհետ կորել՝ 42-ը։ Սեպտեմբերի 25-ին Ստեփանակերտի մոտ գտնվող բենզինի պահեստի պայթյունի հետևանքով կա 218 զոհ, 21 անհետ կորած, 3 չնույնականացված դի և 120 վիրավոր։ Արցախի տեղեկատվական շտաբի տվյալներով՝ 2023-ի սեպտեմբերի 19-ին Ադրբեջանի կողմից Արցախի նկատմամբ սանձազերծված ռազմական գործողությունների ընթացքում զոհվել է 265 զինծառայող։
Կարդացեք նաև՝
«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն
