Բաքվի և Երևանի միջև խաղաղության համաձայնագիրը Հայաստանի և Ադրբեջանի սահմանին ստորագրելու գաղափար կա, Անթալիայի դիվանագիտական ֆորումի շրջանակներում թուրքական լրատվամիջոցներին տված հարցազրույցում հայտարարել է ՀՀ ԱԳ նախարար Արարատ Միրզոյանը։
«Հայաստանի և Ադրբեջանի միջև բանակցությունները շարունակվում են: Ինչ վերաբերում է խաղաղության պայմանագրի ստորագրման տեղին, գիտեք՝ դա էական չէ: Մի քանի այլ մայրաքաղաք առաջարկում են իրենց ծառայությունները, չեմ բացառում որևէ բան: Ես դեռ չեմ ստացել այդ առաջարկը»,- ասել է Միրզոյանը։
Նա հստակեցրել է, որ ադրբեջանցի գործընկերներին ստորագրման արարողության տեղը և ժամկետը որոշելու առաջարկ են արել, սակայն Բաքուն գտնում է, որ Երևանը պետք է կատարի որոշ հավելյալ քայլեր, որպեսզի պայմանագրի ստորագրումը հնարավոր դառնա։ Միրզոյանի խոսքով՝ օրինակներից մեկը ՀՀ սահմանադրության մեջ փոփոխություններ անելու և Անկախության հռչակագիրը հանելու մասին Ադրբեջանի պահանջն է։
Միրզոյանը նաև հայտնել է, որ խաղաղության պայմանագրով նախատեսվում է ստեղծել երկկողմ մեխանիզմ՝ հանձնաժողով, որը կհետևի պայմանագրի կատարմանը։
«Հանձնաժողովը պետք է զբաղվի բոլոր այն հնարավոր դժվարություններով և անհարթություններով, որոնք կարող են և, ամենայն հավանականությամբ, կարձանագրվեն գործընթացի ընթացքում։ Այլ կերպ ասած՝ մենք ձևավորում ենք գործիքակազմ այդ մարտահրավերները կառավարելու նպատակով»,- հավելել է նախարարը։
Միրզոյանը, սակայն, թուրքական ԶԼՄ-ներին ասել է, որ հայկական կողմն Ադրբեջանի՝ խաղաղություն կառուցելու պատրաստակամության շուրջ մտահոգություններ ունի, որը նախարարը կապել է վերջին շրջանում Բաքվի հռետորաբանության և գործողությունների հետ։ Նա չի բացառել էսկալացիան։
«Խնդիրն այն է, որ երբեմն մենք ունենում ենք այն զգացումը, որ Ադրբեջանը պարզապես չի ցանկանում խաղաղություն կառուցել Հայաստանի հետ։ Թե ինչ հաշվարկներից ելնելով՝ չեմ կարող ասել, բայց մենք իսկապես մտահոգություն ունենք, որ նրանք չեն ցանկանում ավարտին հասցնել կարգավորումը, չեն ցանկանում ավարտին հասցնել բանակցությունները և ստորագրել խաղաղության պայմանագիրը։ Ավելին, մենք պարբերաբար ականատես ենք լինում լարվածության նոր դրսևորումների ինչպես Ադրբեջանի ղեկավարության հռետորաբանության մեջ, այնպես էլ իրավիճակի իրական զարգացման առումով, ինչը, ցավոք, կարող է հանգեցնել նաև գետնի վրա էսկալացիայի»,- ընդգծել է նա։
Միևնույն ժամանակ՝ նախարարը հավելել է, որ «ՀՀ կառավարության և վարչապետ Նիկոլ Փաշինյանի խաղաղության օրակարգը լիարժեք աջակցություն ունի հայ հասարակության կողմից»։
Խոսելով հայ-թուրքական հարաբերություններից՝ արտաքին քաղաքական գերատեսչության ղեկավարը նշել է, որ դրանք կարող են դրական ազդել հայ-ադրբեջանական հարաբերությունների վրա։
«Եթե կարողանանք լիարժեք կարգավորել հայ-թուրքական հարաբերությունները, այն միանշանակ ու անկասկած դրական ազդեցություն կունենա նաև հայ-ադրբեջանական կարգավորման վրա։ Կարո՞ղ է Թուրքիան դրական դեր խաղալ։ Անկասկած՝ այո»,- թուրք լրագրողի հարցին ի պատասխան նշել է Միրզոյանը։
Թուրք լրագրողները մեջբերել են Փաշինյանի հայտարարությունը, թե Հայոց ցեղասպանության միջազգային ճանաչումը ներկայումս ՀՀ-ի արտաքին քաղաքականության առաջնահերթությունների շարքում չէ։ Հարցին, թե Ցեղասպանության հարցն այլևս լարվածության աղբյուր չի՞ լինի Թուրքիայի և Հայաստանի միջև, Միրզոյանը մատնանշել է դեպի ապագա կենտրոնանալու կարևորությունը։
«Ամենայն հավանականությամբ, առաջ գնալու համար պետք է մի քիչ ավելի շատ քաջություն, մի քիչ ավելի շատ ըմբռնում և մի փոքր ավելի շատ կենտրոնացում և հավատ ապագայի նկատմամբ: Մենք նախընտրում ենք ապագան։ Դա պետք է անենք համատեղ։ Գիտեք, ես մենակ չեմ կարող դա անել։ Իմ թուրք գործընկերն էլ մենակ չի կարող։ Ոչ ոք մենակ չի կարող։ Բայց միասին կարող ենք հիշել պատմությունը և, միևնույն ժամանակ, առաջ շարժվել ու կառուցել ավելի լավ ապագա։ Ես այսօր կրկին ու կրկին կրկնում եմ այս միտքը. սա ընտրության հարց է, ի՞նչ ենք մենք ընտրում»,- ընդգծել է նա։
Ապրիլի 12-ին Միրզոյանը դիվանագիտական ֆորումի շրջանակում բանակցություններ էր վարել Ադրբեջանի ԱԳ նախարար Ջեյհուն Բայրամովի հետ և ելույթ ունեցել Ադրբեջանի ու Վրաստանի արտաքին գործերի նախարարների մասնակցությամբ կազմակերպված պանելային քննարկմանը։
