Եմենի մայրաքաղաք Սանայում և հութի ապստամբների վերահսկողության տակ գտնվող երկրի այլ շրջաններում ԱՄՆ-ի հարվածների հետևանքով առնվազն 31 խաղաղ բնակիչ է զոհվել, շուրջ 100 մարդ վիրավորվել է, ՏԱՍՍ-ի փոխանցմամբ՝ այս մասին հայտնել է ապստամբների առողջապահության նախարարության ներկայացուցիչ Անիս ալ Ասբահին։
«Նախնական տվյալներով՝ Սանայում, Սաադա, Էլ Բեյդա Նահանգներում և Ռադաա քաղաքում քաղաքացիական օբյեկտների և բնակելի շրջանների դեմ ուղղված ամերիկյան ագրեսիայի հետևանքով զոհվել է 31 մարդ, վիրավորվել՝ ևս 101-ը»,- գրել է նա X-ում:
Ալ Ասբահիի պնդմամբ՝ զոհվածների և վիրավորների մեծ մասը կանայք և երեխաներ են:
Մարտի 15-ին ԱՄՆ Զինված ուժերը նախագահ Դոնալդ Թրամփի հրամանով սկսել են զանգվածային հարվածներ հասցնել Եմենի տարածքին, որը գտնվում է հութիների վերահսկողության տակ: Ինչպես հայտարարել է ԱՄՆ ԶՈւ կենտրոնական հրամանատարությունը, գործողությունն ուղղված է ամերիկյան շահերի պաշտպանությանը և նավարկության ազատության ապահովմանը: «Անսար Ալլահ» շարժումը խոստացել է պատասխանել էսկալացիային՝ միաժամանակ պնդելով, որ գնդակոծության են ենթարկվում քաղաքացիական օբյեկտները:
