Սիրիայի նոր կառավարության անվտանգության ուժերը փակել են դեպի ափամերձ Տարտուս և Լաթաքիա նահանգներ տանող ճանապարհները, որտեղ մարտի 6-ից զինված բախումներ են տեղի ունենում նախկին նախագահ Բաշար ալ Ասադի կողմնակիցների հետ, հայտնում է «ՏԱՍՍ»-ը՝ հղում անելով SANA գործակալությանը։
Սիրիայի պաշտպանության նախարարությունում գործակալության աղբյուրի խոսքով՝ այս որոշումն ընդունվել է այն բանից հետո, երբ զինվորականները «վերականգնել են վերահսկողությունը այն շրջանների մեծ մասի նկատմամբ, որտեղ գործել են նախկին ռեժիմի կողմնակիցները»։ Ճանապարհների շրջափակումն ուղղված է տեղում «հնարավոր խախտումները կանխելուն» և «նշված տարածաշրջանում իրավիճակի կայունացմանը»։
Աղբյուրն ընդգծել է, որ Սիրիայի նոր իշխանություններն արդեն ստեղծել են «հատուկ կոմիտե, որը կքննի վերջին ռազմական գործողության ընթացքում իշխանության չարաշահման դեպքերը», և բոլոր կասկածյալների գործերը կքննարկվեն տրիբունալի կողմից։
Սիրիայի անվտանգության ուժերը նաև հայտնել են, որ վերջին երկու օրվա ընթացքում Տարտուս և Լաթաքիա նահանգներում ավելացել են թալանի և գողության հետ կապված հանցագործությունները: Այս հարցերով արդեն զբաղվում են իրավապահները, նշել է SANA-ն։
Սիրիայում զինված հակամարտությունն սկսել էր 2011 թվականից։ Զինադադարը խախտվել էր 2024-ի նոյեմբերի 27-ին, երբ սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական խմբավորման գլխավորությամբ, հարձակում էին սկսել երկրի հյուսիս-արևմուտքում կառավարական ուժերի դեմ: Նրանք մեկ շաբաթվա ընթացքում գրավել էին երկրի բոլոր խոշոր քաղաքները՝ Հալեպը, Համան, Հոմսը և Դամասկոսը: Ավելի ուշ՝ դեկտեմբերին, այս խմբերը ձևավորել էին նոր կառավարություն՝ ներառյալ նոր պաշտպանության նախարարությունը:
«Գանձասար» թերթի խմբագիր Զարմիկ Պողիկյանն Armenia Today-ին հայտնել էր, որ հայկական համայնքի նկատմամբ նոր իշխանությունների վերաբերմունքը շատ հարգալից է։
Մարտի 6-ին Լաթաքիա, Տարտուս և Հոմս նահանգներում բախումներ էին սկսվել անվտանգության ուժերի և նախկին նախագահի կողմնակիցների զինված խմբերի միջև։ Ամենածանր բախումները տեղի են ունեցել Ջեբլա քաղաքում, որտեղ ապրում են ալավիները՝ կրոնական փոքրամասնություն, որին պատկանում է Ասադների ընտանիքը։ Մարտի 7-ին նոր իշխանությունները վերահսկողության տակ էին վերցրել Լաթաքիա քաղաքը՝ հեռացնելով Ասադի զինված կողմնակիցներին։ Բախումների հետևանքով զոհվել էր մոտ 200 անձ։
Իշխանությունները բանակի ստորաբաժանումներ և զրահատեխնիկա են ուղարկել երեք նահանգ, իսկ խոշոր քաղաքներում պարետային ժամ է սահմանվել։ Մարտի 8-ին «Գանձասար»-ը հայտնել էր, որ Լաթաքիայի հայերին հրահանգվել է տներից դուրս չգալ։
