Երևանի նախկին քաղաքապետ, «Նոր ուժ» կուսակցության նախագահ Հայկ Մարությանը 76 հազար ստորագրություն է հավաքել ընդդեմ հասարակական տրանսպորտի սակագնի բարձրացման, հայտնել է Երևանի ավագանու «Ազգային առաջընթաց» խմբակցության անդամ Իզաբելլա Աբգարյանը։
Միջոցառումը հեռարձակվել է Armenia Today-ի YouTube ալիքով։
«76 հազար ստորագրություն արդեն ունենք, դա ավելի շատ է, քան ՔՊ-ն ստացել է ավագանու ընտրությունների ժամանակ։ Բայց մարդիկ շատ-շատ են դեռ դիմում, ուստի այսօր նույնպես նախաձեռնեցինք այդ հնարավորությունը»,- միջոցառման ժամանակ ասել է նա:
Աբգարյանը նշել է, որ ակցիայի նպատակն է քաղաքացիների հետ միասին որոշել հետագա քայլերը, քանի որ, ըստ նրա, մարդիկ իրենք են դիմում Մարությանի թիմին՝ առաջարկելով բոյկոտի տարբեր ձևեր։
Բողոքի ընթացքում Մարությանը կոչ է արել բոյկոտել հասարակական տրանսպորտի տոմսային նոր համակարգը և հավելել է, որ բոյկոտի տարբեր ձևերով կարելի է հասնել 100 դրամ ուղեվարձի պահպանմանը։
Նախկին քաղաքապետի թիմն արդեն նախագիծ է ներկայացրել քաղաքապետարան, ըստ որի բոլոր փաթեթները կպահպանվեն և կավելացվի ևս մեկը՝ 100 դրամով ճանապարհորդությունը։
«Պետք է հասկանանք, թե բոյկոտի որ ձևն ենք նախընտրելու։ Միգուցե բոյկոտի մի քանի տարբերակ լինի։ Բոյկոտի ձևերից մեկը, օրինակ, կարող է լինել, որ ուսանողները դասադուլ անեն, կարող է լինել գործադուլ մարդկանց կողմից, բոյկոտի մյուս ձևը՝ ընդհանրապես չօգտվել տրանսպորտից, այսինքն՝ աշխատել խուսափել տրանսպորտից օգտվելուց։ Մյուսը՝ մտնել տրնասպորտ, վճարել 100 դրամ, անցնել առաջ։ 2013 թվականին, երբ տեղի ունեցավ տրանսպորտի թանկացման դեմ ընդվզում, գրեթե նույն մեթոդներն էին»,- շեշտել է նա։
Նախկին քաղաքապետն անդրադարձել է նաև Տիգրան Ավինյանի հետ իր բանավեճին և քննադատել Ավինյանի հոր հայտարարությունը, որը վիրավորական արտահայտություններ էր պարունակում Opel-ի վարորդների հասցեին։
Մարությանը հիշեցրել է, որ տրանսպորտի հարցով կապ է հաստատել վարչապետ Նիկոլ Փաշինյանի հետ, քանի որ վստահ է, որ կառավարության ղեկավարը պետք է իր դիրքորոշումն արտահայտի այս իրավիճակի վերաբերյալ։ «Սա կոնկրետ հարվածում է հենց այն մարդկանց, այն սոցիալական խմբերին, որոնց խոստում տալով՝ նրանց միջոցով եկել է իշխանության»,- պարզաբանել է նա։
«Փաշինյանից պատասխան չենք ստացել, ես, 76 հազար օգտվող մարդիկ, բոլորը, ամբողջ հանրությունն սպասում է այդ պատասխանին»,- եզրափակել է նախկին քաղաքապետը։
2024 թվականի մարտի 12-ին Երևանի ավագանին ընդունել էր տոմսերի միասնական համակարգ ներդնելու նախագիծը։ Երևանի քաղաքապետը հունիսի 25-ին ասել էր, որ 2025 թվականի հունվարի 1-ից կսկսի գործել հասարակական տրանսպորտի ուղեվարձի միասնական համակարգ, որը նախատեսում է տրանսպորտի թանկացում։
Նոյեմբերի 3-ին Մարությանը հայտարարել էր հունվարի 1-ից Երևանում հասարակական տրանսպորտի ուղեվարձի թանկացման դեմ ստորագրահավաք սկսելու մասին։ Նոյեմբերի 19-ին Երևանի ավագանին ընդունել էր տրանսպորտի սակագների արտոնությունների փաթեթը, ըստ որի տրանսպորտից օգտվող առանձին խմբերի համար կգործեն այլ սակագներ, առանձին խմբեր տրանսպորտից անվճար կօգտվեն։
