Սիրիայի Հալեպ քաղաքում, ուր նոյեմբերի 27-ին խախտվել էր զինադադարը, դեռ 10-12 հազար հայ կա, այս պահին հայերի տարհանում հնարավոր չէ, լրագրողներին հայտնել է ՀՀ սփյուռքի գործերի գլխավոր հանձնակատարի գրասենյակի հայրենադարձների ինտեգրման վարչության պետ Հովհաննես Ալեքսանյանը։
Նա նշել է, որ իսլամիստ ապստամբների վերահսկողության տակ գտնվող Հալեպից հայերի անվտանգ տարհանման համար որևէ երաշխիք չկա, և այս պահին հնարավոր չէ փաստացիորեն տարհանում իրականացնել և օժանդակություն ուղարկել:
«Մեր տվյալներով՝ շուրջ 10-12 հազար հայ կա։ Այս պահին քաղաքում հանգիստ է։ Հացի արտադրամասերն աշխատում են, պարենի վերաբաշխումն իրականացնում են քաղաքն իրենց վերահսկողության տակ վերցրած ապստամբները։ Այդուհանդերձ, հայ հասարակությունն անհանգիստ է, մեծ տագնապ կա, քանի որ շատերը պատրաստ չէին քաղաքից հեռանալ»,- ընդգծել է Ալեքսանյանը՝ հավելելով, որ օդանավակայանը նույնպես գտնվում է իսլամիստական խմբավորումների ձեռքին և, փաստացիորեն, մեծ քանակով մարդկանց տարհանում կազմակերպելու երաշխիք չկա։
Նա բացատրել է, որ Հալեպը Թուրքիայի սահմանից մոտ 45-50 կմ հեռավորության վրա է, իսկ իսլամիստական խմբավորումները Հալեպի հարավում են՝ մոտ 780 կիլոմետրի վրա։ Բացի այդ, նրանք ամբողջովին վերահսկում են քաղաքի մուտքը, ինչը գործնականում անհնար է դարձնում քաղաքից դուրս գալը, քանի որ քաղաքացու անվտանգությունը երաշխավորված չէ:
«Հիմնական գործողությունները ծավալվում են Իդլիբի շրջանում, և կառավարական բանակը, կարծես, տրամադրված է ճնշել Իդլիբի օջախը, որն իսլամիստների հիմնական տեղակայման վայրն է։ Դրանից հետո Հալեպի ճանապարհը կբացվի և հարց է, թե ինչպիսի՞ գործողություններով հնարավոր կլինի իրավիճակը նախկին պատկերին վերադարձնել»,- եզրափակել է Ալեքսանյանը։
Նա հիշեցրել է հալեպահայ Երվանդ Արսլանյանի զոհվելու մասին, որը Հալեպից դուրս ճանապարհին վիրավորվել էր դիպուկահարի կրակոցից, իսկ հիվանդանոցում նրա կյանքը փրկել չէր հաջողվել։
«Նա միայնակ էր փորձել դուրս գալ քաղաքից։ Ներկա պահին տարհանում կազմակերպելը, ընդհանրապես տարհանման պլան ունենալը խիստ դժվար է»,- հավելել է նա։
Պաշտոնյայի խոսքով՝ նոյեմբերի 27-ից հետո՝ իրադրության սրման առաջին 1-2 օրերին, մի շարք ընտանիքներ կարողացել են դուրս գալ Հալեպից։
«Ընտանիքները կարողացել են երկրորդական ճանապարհներով դուրս գալ քաղաքից, բայց հաջորդիվ քաղաքից դուրս գալու բոլոր ճանապարհները փակվել են։ Մենք կապի մեջ ենք քաղաքից դուրս եկած ընտանիքների հետ։ Նրանց մի մասը Դամասկոսում է, մի մասը՝ Լաթաքիայում և Քեսաբում։ Նրանց թվում կան ընտանիքներ, որոնք տոմսեր են գնել և նրանց ժամանումը Հայաստան սպասվում է դեկտեմբերի 14-ին»,- հստակեցրել է Ալեքսանյանը։
Ալեքսանյանը հավելել է, որ համապատասխան տեղեկանքներ և գործողությունների ծրագիր են ներկայացրել Հայաստանի կառավարությանը, որով անհրաժեշտության դեպքում կարող են մասսայական տարհանում իրականացնել Սիրիայից։
Նա տեղեկացրել է, որ Հայաստանի դեսպանությունը և այլ պետական կառույցներ ուշադիր հետևում են իրավիճակին և վստահեցրել է, որ Սփյուռքի գրասենյակը կապի մեջ է տեղի հասարակական հաստատությունների և Սիրիայում ՀՀ դեսպանության հետ:
Ալեքսանյանը հիշեցրել է, որ հայրենակիցների համար գործում է Հայաստանի դեսպանության և ԱԳՆ թեժ գիծը՝ +963 96 000 36 22։
Նոյեմբերի 27-ին սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական խմբավորման գլխավորությամբ, հարձակում էին սկսել Սիրիայի հյուսիս-արևմուտքում կառավարական ուժերի դեմ: Նրանք գրավել էին Դամասկոսի և Հալեպի միջև ընկած ճանապարհը, որի հետևանքով զոհվել էր շուրջ 200 մարդ, այդ թվում՝ խաղաղ բնակիչներ։
Ըստ AP-ի՝ նոյեմբերի 30-ին գրոհայինները ներխուժել էին Հալեպ և վերահսկողություն հաստատել Սարաքեբ քաղաքի վրա, որը Հալեպը Դամասկոսի և ափի հետ կապող մայրուղիների ռազմավարական խաչմերուկում է: Նոյեմբերի 30-ին սիրիական բանակը հաստատել էր գրոհայինների ներթափանցումը Հալեպ։
ՀՀ ՊՆ-ն նոյեմբերի 30-ին հայտնել էր, որ Հայաստանի իշխանությունները որոշում են կայացրել ժամանակավորապես կասեցնել ՀՀ-ի՝ 2019 թվականից Սիրիայի Հալեպի տարածաշրջանում գործող հումանիտար առաքելության գործունեությունը։
Դեկտեմբերի 1-ին Հալեպից դուրս գալու ժամանակ դիպուկահարի կրակոցից զոհվել էր հալեպահայ Երվանդ Արսլանյանը։
Սիրիայում զինված հակամարտությունն սկսել է 2011 թվականից։ Գրոհայինները պարբերաբար հարձակումներ են իրականացնում մայրուղիների, քաղաքացիական և ռազմական մեքենաների վրա և ահաբեկում հեռավոր գյուղերի բնակիչներին: Սիրիական բանակը շարունակում է գրոհայինների ջոկատների ոչնչացման գործողությունները։
