Հայաստան-Իրան էլեկտրահաղորդման երրորդ գիծը կմիացնի Հայաստանի, Իրանի, Ռուսաստանի և Վրաստանի էներգետիկ համակարգերը, Երևանում Եվրասիական տնտեսական համաժողովում ասաց ՀՀ տարածքային կառավարման և ենթակառուցվածքների փոխնախարար Հակոբ Վարդանյանը։ Նրա խոսքով՝ գծի և ենթակայանի շինարարության 85 տոկոսն արդեն ավարտված է։
«Ամբողջ նախագիծը երկու ուղղությամբ ավարտելուց հետո մենք հնարավորություն կունենանք կապել չորս երկրներ՝ Իրանը, Հայաստանը, Վրաստանը և Ռուսաստանը։ Բայց մեծ պատկերում դա Իրանն ու Ռուսաստանն են, քանի որ Վրաստանը գործում է որպես ռուսական էներգետիկ համակարգի մաս, իսկ մենք՝ որպես Իրանի էներգետիկ համակարգի մաս: Առաջին անգամ հնարավոր կլինի միացնել երկու նման խոշոր էներգետիկ համակարգեր»,- ասել է Վարդանյանը։
Իրանի հետ էլեկտրահաղորդման երրորդ գիծը 400 կիլովոլտանոց գիծն է, որը հնարավորություն կտա ժամում 1200 մեգավատտ հոսքի, նշել է փոխնախարարը։ Նա ասաց, որ 280 կիլոմետրանոց գիծը Հրազդանի տարածաշրջանից հասնում է Իրանի հետ սահման։ Մեկ այլ ենթակայան կտեղակայվի Սյունիքի մարզում՝ Իրանի հետ սահմանից մոտավորապես 150 կիլոմետր հեռավորության վրա։
Վարդանյանն ասաց, որ նոր հզորությունների կառուցումից հետո Հայաստանը հնարավորություն կունենա էլեկտրաէներգիա արտահանել երկու ուղղություններով։
«Մենք դեռ շատ ավելորդ էլեկտրաէներգիա ունենք, մենք կարող ենք արտադրել գրեթե այնքան, որքան սպառում ենք երկրում»,- եզրափակեց նա և նշեց, որ այդ հնարավորությունները կավելանան։
Հայաստան-Իրան էլեկտրահաղորդման երրորդ գծի շինարարությունն սկսվել էր 2015թ.։ 2023 թվականի հունիսին ՀՀ վարչապետ Նիկոլ Փաշինյանը հայտարարել էր Հայաստան-Իրան և Հայաստան-Վրաստան էլեկտրահաղորդման գծերի կառուցման միջոցով Հյուսիս-հարավ էլեկտրաէներգիայի երթուղու ձևավորման, ինչպես նաև էլեկտրաէներգիայի արտահանման, ներմուծման, տարանցման կամ սեզոնային փոխանակման ավելացման նոր հնարավորությունների մասին։
