Դեկտեմբերի 23-ին սպասվող ՀՖՖ նախագահի ընտրություններում իշխանությունների «այո»-ն ստացած Արմեն Մելիքբեկյանին դեմ են արտահայտվել հայկական թոփ երկու առաջատար ակումբները, 4 ակումբների ֆանատական շարժումները՝ «Ուրարտու», «Փյունիկ», «Արարատ Արմենիա» և «Շիրակ»: Ազգային հավաքականի ֆան ակումբներից ամենամեծը՝ FAF-ը, երեկ քննադատել է Մելիքբեկյանին ու հայտարարել, որ չի սատարում նրան, գրել է «Ժողովուրդ»-ը:
««Ուրարտու» և «Փյունիկ» ակումբները միասին պահում են ամենամեծ երկու ակադեմիաները և ֆուտբոլի հիմնական դարբնոցն են. այս ակումբների սեփականատերերն ամեն ամիս իրենց գրպաններից ծախսում են հարյուր հազարավոր դոլարներ, ու եթե հեռանան, ապա շուրջ 3000 երեխա կզրկվի մարզվելու հնարավորությունից, այդ թվում՝ մարզադաշտերից»,- նշել է թերթը:
Ըստ հրապարակման՝ ՀՖՖ ներկա ղեկավարին չի սատարում Հայաստանի հավաքականի նախկին խաղացողների մեծագույն մասը, իսկ ով էլ չեզոք է, ըստ հիմնավոր տեղեկությունների, որոշակի հետաքրքրություն ունի այս ֆեդերացիայից:
«Արմեն Մելիքբեկյանին շաբաթ օրը կընտրեն ՀՖՖ անդամ այն ՀԿ-ները, որոնց ֆեդերացիա են բերել հենց իրենք, ու որոնք ֆինանսապես կախված են իրենցից: Նման ՀԿ-ներն ունեն հավասար մեկ ձայն, ինչպես ոլորտում իրոք եղանակ ստեղծող խոշոր ակումբները, ինչն անտրամաբանական է»,- նկատել է թերթը:
Նշվում է, որ Մելիքբեկյանին սատարում են այնպիսի ֆուտբոլային ակումբներ, որոնք կա՛մ ակտիվ գործունեություն չեն ծավալում, կա՛մ մեղադրվում են պայմանավորված խաղեր կազմակերպելու համար:
«Մեր տեղեկություններով՝ Մելիքբեկյանի ընտրվելու դեպքում Բարձրագույն խմբի մի քանի ակումբներ պատրաստվում են դուրս գալ առաջնությունից, իսկ ֆանատական շարժումներն ու ակադեմիաներում մարզվող ծնողներն արդեն խմբեր են ձևավորել ու պատրաստվում են բողոքի ակցիա իրականացնել ՀՀ կառավարության դիմաց, քանզի վստահ են, որ Արմեն Մելիքբեկյանի ամենաթողությունը գալիս է հենց վարչապետից»,- ասված է հոդվածում:
Ըստ լրատվականի՝ ոլորտի մասնագետները պնդում են, որ նախկին լրագրող Արմեն Մելիքբեկյանին լեգիտիմ նախագահ անվանել չի կարելի, ու որ այս ամենը ծաղր է հայկական ֆուտբոլի ապագայի նկատմամբ, իսկ երկրի բարձրագույն ղեկավարությունը լուռ է:
ՀՖՖ ղեկավարի ընտրությունները կկայանան դեկտեմբերի 23-ին: Նախագահի թեկնածուներն են գործող նախագահ Արմեն Մելիքբեկյանը և ՀՀ ազգային հավաքականի նախկին հարձակվող Արազ Օզբիլիզը:
