«Արցախբանկը» կվերադարձնի Արցախից բռնի տեղահանվածների գրավադրած ոսկյա իրերը՝ առանց հաճախորդների կողմից վարկային պարտավորությունների մարման, հայտնում են բանկից՝ տեղեկացնելով, որ գործընթացը կիրականացվի Երևանում։
«Նպատակ ունենալով որոշակի չափով աջակցել 2023թ. սեպտեմբերի 19-ին Ադրբեջանի կողմից Արցախի դեմ սանձազերծված ռազմական գործողությունների հետևանքով ֆինանսական ծանր կացության մեջ հայտնված Արցախից տեղահանված մեր հայրենակիցներին՝ բանկը վերադարձնում է Արցախում տրամադրված ոսկու գրավով վարկերի համար գրավադրված ոսկյա իրերն առանց հաճախորդների կողմից վարկային պարտավորությունների մարմանը»,-հայտնում են բանկից։
Տեղեկացնում են, որ բանկը Ստեփանակերտ քաղաքում արդեն իսկ 400-ից ավելի վարկառուների վերադարձրել է վերջիններիս կողմից գրավադրած ոսկյա իրերը, նախատեսում է 500-ից ավել հաճախորդների ևս վերադարձնել:
«Հոկտեմբերի 11-ից սկսած բանկի այն հաճախորդները, որոնց չի հաջողվել Արցախում ստանալ գրավադրված ոսկյա իրերը, կարող են անձը հաստատող փաստաթղթերով ներկայանալ բանկի Նաիրի մասնաճյուղ (հասցե՝ ք.Երևան 0001, Սայաթ-Նովա պող. 10/1): Ձեզ հուզող հարցերի դեպքում կարող եք դիմել բանկի մասնաճյուղեր, ինչպես նաև զանգահարել բանկի զանգերի կենտրոն՝ 012 777771, 777772 հեռախոսահամարներով»,- հայտնել են բանկից։
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ռազմական ագրեսիայի հետևանքով, վերջին տվյալներով, 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա) կա։ Սեպտեմբերի 29-ին Արցախի ՆԳՆ-ն հայտնել էր, որ փրկարարներն Ստեփանակերտի բենզինի պահեստի պայթյունի վայրից 170 աճյուն և մասունք են հայտնաբերել:
