Պետք է կանխել Թուրքիայի ցեղասպան մտադրությունը․ Քրդական համայնքի ներկայացուցիչները նամակ են հանձնել ՄԱԿ-ի գրասենյակին

Հայաստանի քրդական համայնքը բողոքի ակցիա է իրականացնում ՄԱԿ-ի գրասենյակի մոտ։ ԱԺ «Քաղաքացիական պայմանագիր» խմբակցության պատգամավոր, Հայաստանի քրդական համայնքի ներկայացուցիչ Կնյազ Հասանովն իր խոսքում նշեց, որ այսպես իրենց ձայնն են բարձրացնում թուրքական իշխանությունների կատարած ոճրագործությունների դեմ, որոնք ուղղված են Իրաքի, Սիրիայի և, ընդհանրապես, քուրդ ժողովրդի նկատմամբ։

«Էրդողանը բացահայտ հայտարարում է, որ պետք է ոչնչացնել քրդերին՝ իբրև ահաբեկչությունը զսպելու նպատակով։ Աշխարհի ամենահզոր ահաբեկիչները հենց Թուրքիայի իշխանություններն են»,- ասաց Կնյազովը։

Նա նշեց, որ այսօր քուրդ ժողովրդի 4 մասերին հորդորում է միանական լինել՝ թուրքական ոճրագործությունը կանխելու համար։ Նա նաև միջազգային հանրությանը կոչ արեց հետևողական լինել, ձեռք մեկնել և կանխեն թուրքական իշխանությունների ցեղասպան մտադրությունները։

«Այսօր թուրքական իշխանություններն աշխարհի համար դարձել են չարիք։ Նույն բանը տեսնում ենք Ադրբեջանի կողմից՝ հայ ժողովրդի նկատմամբ։ Մենք՝ որպես Հայաստանի քաղաքացիներ, ուզում ենք, որ աշխարհը տեսնի այս բոլոր հանցագործությունները, սակայն միջազգային հանրությունն ամեն ինչ անում է իր շահերի համար կամ ոչինչ չի անում»,- նշեց նա։

Քրդական համայնքի ներկայացուցիչներն այնուհետև նամակ հանձնեցին ՄԱԿ-ի գրասենյակի ներկայացուցչին, ինչպես նաև այրել Թուրքիայի դրոշը։

Armenia Today-ին տված հարցազրույցում Հասանովը բացատրեց, որ նամակով դիմել են ՄԱԿ-ի հայաստանյան գրասենյակին՝ խնդրելով այս հարցը բարձրացնել միջազգային հարթակներում։ «Նամակի հիմնական բովանդակությունը համաշխարհային հանրության և գերտերությունների ուշադրությունը հրավիրելն է Թուրքիայի այս քաղաքականության վրա՝ այն կանխելու նպատակով»,- ընդգծեց նա։

«Քուրդ Ազատամարտիկները տարիների ընթացքում ապացուցել են, որ իրենց պայքարն արդար է և ողջ մարդկության համար է։ Շովինիզմի օջախը, որը տարիներ շարունակ օգտագործվում է Մերձավոր Արևելքի ժողովուրդների անդորրը խախտելու համար, Թուրքիան է։ Իսկ այս օջախը կործանման եզրին է։ Օգտագործենք մեր միացյալ ուժերը, որպեսզի վերջնականապես քանդենք այս պատը և կառուցենք ժամանակակից աշխարհ, չկործանվենք, այլ փրկվենք»,- ասված է նամակում։

Հիշեցնենք, որ նոյեմբերի 20-ին Անկարան օդային գործողություն էր իրականացրել Սիրիայի հյուսիսում՝ Թուրքիայում արգելված Քրդստանի աշխատավորական կուսակցության սիրիական թևի դեմ. հաղորդվել է, որ հարվածներ են հասցվել Քոբանի քաղաքին, ինչպես նաև Հյուսիսային Իրաքին: Թուրքական ռմբակոծության հետևանքով սիրիացի քրդերի մեջ կան զոհեր և վիրավորներ։

Մանրամասները՝ տեսանյութում։