Դատախազը դադարեցրել է «Բարգավաճ Հայաստան» կուսակցության առաջնորդ, գործարար Գագիկ Ծառուկյանի նկատմամբ խոշոր չափերով հարկերից խուսափելու մեղադրանքը, հայտնել է փաստաբան Երեմ Սարգսյանը: Ծառուկյանի գործով ուղիղ հեռարձակումը Քննչական կոմիտեի բակից՝ Armenia Today-ի Youtube-ի ալիքով։
Ծառուկյանին այսօր ցերեկը տեղափոխել էին Քննչական կոմիտե՝ հարցաքննության։ ՔԿ շենքի մոտ նրան դիմավորել էին աջակիցներն ու փաստաբանները:
Սարգսյանը լրագրողներին հայտնել է, որ Ծառուկյանը ՔԿ էր ներկայացվել լրացուցիչ հարցաքննության, սակայն պաշտպանական կողմին չի պարզաբանվել, թե որ դրվագի շրջանակում է այն իրականացվում։
Նա հավելել է, որ Ծառուկյանի կալանքի դեմ վերաքննիչ բողոքի վերաբերյալ առայժմ նորություն չկա։ Սարգսյանի խոսքով՝ առաջիկա մեկ-երկու օրում հայտնի կդառնա, թե ո՞ւմ է մակագրվել գործը և ի՞նչ ընթացակարգով է քննվելու։
Պաշտպանական կողմը նաև միջնորդել է առերեսում կազմակերպել փողերի լվացման գործով անցնող իրանցի գործարարների հետ, սակայն, Սարգսյանի փոխանցմամբ, քննչական գործողություն դեռևս չի իրականացվել։
Սարգսյանի և Ծառուկյանի մյուս փաստաբան Էմին Խաչատրյանի պնդմամբ՝ իրանցի գործընկերների հետ գործարքի շրջանակում տուժողը հենց Ծառուկյանն է, սակայն ներկայացվում է բոլորովին այլ իրականություն։ Խաչատրյանը հավելել է, որ գործով անցնող իրանցիները Ծառուկյանին 14,5 մլն դոլար են պարտք։ Նրա խոսքով՝ պաշտպանական կողմը ներկայացրել է փաստաթղթեր, որոնց համաձայն՝ իրանցիներն ստորագրել են պարտավորագիր՝ երկու տարվա ընթացքում 14,5 մլն դոլարի պարտքը վերադարձնելու վերաբերյալ։
Սարգսյանը կարծիք է հայտնել, որ քրեական հետապնդումը կարող է ուղղված լինել նրան, որ իրանցի գործարարները չկատարեն իրենց պարտավորությունները։
Նա նաև հայտնել է, որ պաշտպանական կողմը միջնորդել է կազմակերպել առերեսում իրանցի քաղաքացիների հետ, սակայն մինչ այժմ այն չի իրականացվել։
Փաստաբանը նաև հայտնել է, որ պաշտպանական կողմը դատարանում բարձրացրել է քրեական հետապնդման հնարավոր քաղաքական ենթատեքստի վերաբերյալ փաստարկներ՝ վկայակոչելով, մասնավորապես, ՀՀ վարչապետ Նիկոլ Փաշինյանի հայտարարությունները Ծառուկյանին ընտրակաշառքի գործով արդարացնելուց հետո։
Սարգսյանի խոսքով՝ պաշտպանական կողմն ուղղակիորեն հարցրել է դատավորին, թե արդյոք նա ի վիճակի՞ է քննել գործը քաղաքական ճնշումների պայմաններում։
«Մենք ոչ միայն ներկայացրել ենք այդ հանգամանքները, այլև դատավորին ուղիղ հարց ենք տվել՝ արդյոք նա ի վիճակի՞ է նման քաղաքական ճնշումների պայմաններում անկախ որոշում կայացնել։ Սակայն դատարանի որոշման մեջ մեր այդ փաստարկներին որևէ անդրադարձ չկար»,- հայտարարել է Սարգսյանը։
Փաստաբանի խոսքով՝ Ծառուկյանի նախաձեռնած Հայ-իրանական առևտրային նախագիծը միտված էր երկու երկրների տնտեսական համագործակցության խորացմանը և նա չի ունեցել անձնական շահ ստանալու նպատակ։ Նա հավելել է, որ Ծառուկյանն անձամբ չի մասնակցել Հայ-իրանական առևտրային կենտրոնի օպերատիվ կառավարմանը՝ այն վստահելով գործընկերներին։
Սարգսյանի խոսքով՝ Իրանի իշխանություններն էլ իրենց քննության արդյունքում արձանագրել են որոշ քաղաքացիների կողմից չարաշահումներ, ինչի մասին առկա են պաշտոնական փաստաթղթեր։
Փաստաբանը պնդում է նաև, որ Իրանի իշխանությունները հետագայում զրկել են այդ ձեռնարկատերերին համապատասխան լիցենզիաներից՝ հայտնաբերված խախտումներից հետո, բայց, միաժամանակ, պահպանել են հետաքրքրությունը հայկական կողմի հետ համագործակցությունը շարունակելու հարցում։
Փաշինյանի և Ծառուկյանի միջև հեռակա բանավեճ էր սկսվել նախընտրական քարոզարշավի ընթացքում։ Այդ ժամանակ Փաշինյանը հայտարարել էր, որ միլիարդատեր քաղաքական գործիչները պետք է սնանկանան՝ նկատի ունենալով նաև Ծառուկյանին։
Նույն ժամանակահատվածում վարչապետը հայտարարել էր նաև «Բարգավաճ Հայաստան» կուսակցության առաջնորդի հետ կապվող «Արարատցեմենտ» ընկերությունը պետական վերահսկողության տակ վերցնելու մտադրության մասին, որից հետո նախաձեռնվել էին ձեռնարկության գործունեությանը վերաբերող վարույթներ, ավելի ուշ ընկերությունն անցել էր պետության կառավարմանը։ Ծառուկյանին պատկանող «Մուլտի Ուելնես» մարզասրահի շենքը նույնպես անցել էր Երևանի քաղաքապետարանին։
Հուլիսի 6-ի առավոտյան Ծառուկյանի տանը, ինչպես նաև նրա հետ կապվող ավելի քան 70 ընկերությունում իրականացված խուզարկություններից հետո նրան ձերբակալել էին։ Հուլիսի 7-ին դատարանը կալանավորել էր քաղաքական գործչին։
Ծառուկյանն անցնում է առանձնապես խոշոր չափերով հարկեր վճարելուց խուսափելու գործով, որի շրջանակում նրան արգելվել է լքել Հայաստանը։ Նա մեղադրվում է նաև ենթադրյալ խոշոր չափերով խարդախության, ապօրինի որսի մեջ։ Այդ քրեական վարույթի շրջանակում նրա առանձնատնից առգրավվել էին կենդանիների խրտվիլակներ, ինչպես նաև երեք առյուծ և մեկ վագր։ Առյուծներից մեկը չէր արթնացել ուժայինների կողմից քնաբեր դեղամիջոց ներարկելուց հետո։
Խուզարկություններից հետո նրան պատկանող բազմաթիվ ընկերություններ շարունակում են կապարակնքված մնալ, ինչը հարուցել է աշխատակիցների դժգոհությունը և բողոքի ակցիաների պատճառ դարձել։ Ակցիաների մասնակիցները հայտարարել էին, որ ձեռնարկությունների փակումը հազարավոր աշխատակիցների զրկել է աշխատանքից և կարող է զգալի տնտեսական կորուստների հանգեցնել։
Կարդացեք նաև՝
«Անմարդկային է», «ազատ տարածք է պետք»․ հարցում՝ Ծառուկյանի կենդանիների մասին
«Ծառուկյանը պետք է տուժող լիներ»․ փաստաբանը փաստաթղթեր է հրապարակել
