Հակակոռուպցիոն կոմիտեն հայտնել է «Ուժեղ Հայաստան» կուսակցությանը վերագրվող նոր քրեական գործի մասին։
Գերատեսչությունը հայտարարել է մի խումբ անձանց ձերբակալության մասին, որոնք մեղադրվում են ենթադրաբար ընտրակաշառք տալու փորձի մեջ։
Կոմիտեից հայտնել են, որ Սյունիքում իրականացված գործողությունների արդյունքում տվյալներ են ստացվել, ըստ որոնց՝ ռուսաստանյան Օրենբուրգում բնակվող հայ գործարարի շրջապատի անձինք ընտրողներին ենթադրյալ կաշառք են խոստացել՝ հօգուտ կուսակցության քվեարկելու դիմաց։
Կոմիտեի վարկածով՝ խոսքը պարտքերի մասնակի ներման, աշխատանքի տեղավորման խոստումների և այլ առաջարկների մասին է։
«Ուժեղ Հայաստան» կուսակցության անդամների կողմից ենթադրյալ ընտրակաշառքներ բաժանելու կամ խոստանալու մասին իրավապահները մարտի 30-ից հաղորդումներ էին տարածել: Կուսակցությունում գործողությունները քաղաքական հետապնդում են համարում։ Կուսակցության վարչապետի թեկնածու Սամվել Կարապետյանը բացառել էր «Ուժեղ Հայաստան»-ի կողմից ընտրակաշառքի կիրառումը՝ վստահեցնելով, որ իր ղեկավարած քաղաքական ուժը գործում է բացառապես օրենքի շրջանակներում։
