«Ուժեղ Հայաստան» կուսակցության երեք ներկայացուցչի նկատմամբ երկամսյա կալանք է կիրառվել, Armenia Today-ին հայտնել է կուսակցության խոսնակ Մարիաննա Ղահրամանյանը։
Նա տեղեկացրել է, որ նրանք կալանավորվել են կուսակցության Ավանի գրասենյակին առնչվող վարույթի շրջանակում։
Armenia Today-ին ապրիլի 29-ին Հակակոռուպցիոն կոմիտեից տեղեկացրել էին, որ խուզարկություններ են իրականացրել «Ուժեղ Հայաստանի» Ավանի գրասենյակում ու ընտրակաշառք ստանալու և բարեգործության արգելքը խախտելու ենթադրյալ դեպքերի առթիվ ձերբակալվածներ կան։
Ղահրամանյանը նշել է, որ կուսակցության գնահատականն իրապահաների գործողություններին մնում է անփոփոխ։ Կուսակցությունում գործողությունները քաղաքական հետապնդում են համարում։
«Այս իշխանությունը հասկանում է, որ շուտով կորցնելու է իշխանությունը, և Սամվել Կարապետյանի առաջնորդած ուժն իրական փոփոխություն է բերում։ Բոլոր այս քրեական գործերը, կտրված, մոնտաժված ձայնագրություններն այդ պատճառով են։ Մարդկանց աշխատավարձերի վերաբերյալ խոսակցությունները փորձ է արվում ներկայացնել որպես մարդկանց «շահագրգռել»»,- հավելել է խոսնակը։
Մարտի 30-ից իրավապահներն «Ուժեղ Հայաստանի» անդամների կողմից ենթադրյալ ընտրակաշառքներ բաժանելու կամ խոստանալու մասին հաղորդումներ էին տարածել: Կուսակցությունում այդ մեղադրանքներն անհիմն էին անվանել և կատարվածը գնահատել որպես քաղաքական հետապնդում։
Ապրիլիլին բերման էին ենթարկվել կուսակցության անդամներ Գոհար Ղումաշյանը և Վերժինե Ստեփանյանը։ Ղումաշյանին մեղադրել էին ենթադրյալ ընտրակաշառքի, իսկ Ստեփանյանին՝ ընտրողներին ակցիայի մասնակցելու հարկադրանքի հոդվածներով։ Նրանց նկատմամբ վարչական հսկողություն էր կիրառվել։ «Ուժեղ Հայաստանի» անվտանգության ծրագրերի բաժնի ղեկավար և համակարգող Արթուր Ավանեսյանը՝ Կանդազը, 2 ամսով կալանավորվել էր ապրիլի 27-ին՝ ենթադրաբար ընտրակաշառք խոստանալու մեղադրանքով։ Նա հացադուլ էր հայտարարել։
