«Ուժեղ Հայաստան» կուսակցության առաջնորդը, անդրադառնալով իրավապահ մարմինների տարածած հաղորդագրություններին և գաղտնալսումներին, որոնք վերաբերում են կուսակցության ներկայացուցիչների կողմից ենթադրյալ ընտրակաշառք տալու դեպքերին, հայտարարել է, որ չի լսել և ոչ մի ձայնագրություն։
«Ես առաջին անգամ ձեզնից եմ լսում։ Ես գիտեմ ձայնագրությունների մասին, բայց ես ընդհանրապես չեմ լսում, որովհետև, վստահ եմ, որ մեր կողմից ոչ մի կաշառք, ոչ մի ապօրինություն չի կատարվում և չի կատարվելու»,- շեշտել է նա։
Կարապետյանն ընդգծել է, որ որևէ առնչություն չունի նման գործընթացների հետ և հավելել, որ եթե նման սխալ թույլ տված լինեին, հարյուրավոր մարդիկ էին բանտերում հայտնվելու։
«Բանտարկելով մեր մարդկանց՝ չեն կարող բանտարկել այդ մարդկանց մտքերը, սկզբունքները, համառությունը, և իրենք բոլոր տեղերում ունենալու են ֆիասկո։ Դուք դրանում չկասկածեք, որովհետև իրենք ամեն ինչ անում են ոչ օրենքի սահմաններում, և այդ անողներն օրենքի սահմաններում պատասխան են տալիս»,- նշել է նա։
Կարապետյանը վստահեցրել է, որ իր ղեկավարած քաղաքական ուժը գործում է բացառապես օրենքի շրջանակներում։
Մարտի 30-ից իրավապահներն «Ուժեղ Հայաստանի» անդամների կողմից ենթադրյալ ընտրակաշառքներ բաժանելու կամ խոստանալու մասին հաղորդումներ էին տարածել: Կուսակցությունում այդ մեղադրանքներն անհիմն էին անվանել և կատարվածը գնահատել որպես քաղաքական հետապնդում։
Ապրիլին բերման էին ենթարկվել կուսակցության անդամներ Գոհար Ղումաշյանը և Վերժինե Ստեփանյանը։ Ղումաշյանին մեղադրել էին ենթադրյալ ընտրակաշառքի, իսկ Ստեփանյանին՝ ընտրողներին ակցիայի մասնակցելու հարկադրանքի հոդվածներով։ Նրանց նկատմամբ վարչական հսկողություն էր կիրառվել։ «Ուժեղ Հայաստանի» անվտանգության ծրագրերի բաժնի ղեկավար և համակարգող Արթուր Ավանեսյանը՝ Կանդազը, 2 ամսով կալանավորվել էր ապրիլի 27-ին՝ ենթադրաբար ընտրակաշառք խոստանալու մեղադրանքով։
