«Ուժեղ Հայաստան» կուսակցության առաջնորդ, «Տաշիր» ընկերությունների խմբի նախագահ Սամվել Կարապետյանն ընդունակ է իր շուրջ համախմբել պրոֆեսիոնալ տնտեսագետներից և տեխնոկրատներից կազմված ուժեղ կառավարություն, հայտարարել է ՀՀ նախկին նախագահ Լևոն Տեր-Պետրոսյանը։
Նրա խոսքով՝ այդ կառավարության առաջնահերթ խնդիրը կլինի երկրի ամրապնդումը և բնակչության սոցիալական վիճակի բարելավումը։ Տեր-Պետրոսյանը վստահություն է հայտնել, որ հաղթանակի դեպքում Կարապետյանը չի հրաժարվի Հայաստանի և այլ պետությունների միջև կնքված պայմանագրերից, փոխարենը՝ ավելի կամրապնդի նրանց առջև Հայաստանի ստանձնած պարտավորությունները:
«Կարապետյանի հաղթանակի պարագայում ինքնաբերաբար կվերանա նաև պետության կողմից եկեղեցու նկատմամբ սանձազերծված հակասահմանադրական և ազգադավ արշավը, ինչը, հաստատաբար, կվերականգնի ամբողջ հայության միաբանությունը»,- հավելել է նախկին նախագահը։
Փետրվարի 27-ին Տեր-Պետրոսյանը հայտարարել էր, որ պառակտված ընդդիմությանը միավորելու միակ կարող ուժը Կարապետյանն է: «Լինելով ինքնաբավ և կայացած անձնավորություն՝ Կարապետյանն ունակ է լուծել այդ խնդիրը»,- շեշտել էր նա:
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։
Կարապետյանը կալանքից հետո հայտարարել էր «Մեր ձևով» շարժումը նախաձեռնելու մասին: Հունվարին «Մեր ձևով»-ը ներկայացրել էր Կարապետյանի կողմից առաջարկված տնտեսական զարգացման հայեցակարգը։ Նա փետրվարի 11-ին միաձայն ընտրվել էր «Ուժեղ Հայաստան» կուսակցության նախագահ, ԱԺ ընտրություններում քաղաքական ուժի վարչապետի թեկնածուն է:
