Իրանը մարտի 1-ի առավոտյան հարվածներ է հասցրել Արաբական Միացյալ Էմիրությունների Դուբայ քաղաքին, ինչի հետևանքով պայթյուններ են որոտացել, հայտնել է Times of Israel-ը։
«Ռիա Նովոստին», հղում անելով, զբոսաշրջիկներին, գրել է, որ պայթյուններ են լսվել նաև Շարժայի օդանավակայանի տարածքից։ Fars-ի տվյալներով՝ Իրանը հարվածներ է հասցրել նաև Դուբայում ԱՄՆ Կենտրոնական հետախուզական վարչության շտաբին։ Նշվում է, որ պայթյուններից հրդեհ է բռնկվել «Բուրջ ալ Արաբ»՝ աշխարհի ամենաբարձր համարվող հյուրանոցում։
Reuters-ը հայտնել է, որ Կատարի մայրաքաղաք Դոհայում նույնպես պայթյուններ են լսվել։ Ականատեսների տեղեկություններով՝ քաղաքի վրա առնվազն 11 պայթյուն է հնչել, աշխատում է ՀՕՊ համակարգը։
«Զվարթնոց» օդանավակայանի չվացուցակից տեղեկանում ենք, որ չեղարկվել են Երևան-Շարժա, Շարժա-Երևան՝ մարտի 1-ին նախատեսված չվերթերը։
Փետրվարի 28-ի առավոտյան Իսրայելը հայտարարել էր Իրանի դեմ «լայնածավալ մարտական գործողություններ» սկսելու մասին: Պաշտպանության նախարար Իսրայել Կացը հայտնել էր Իրանի տարածքում «կանխարգելիչ» հարվածների մասին: Ավելի ուշ ԱՄՆ-ն միացել էր գործողությանը: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը:
Կարդացեք նաև՝
Ռազմական գործողությունների հետ կապված մի շարք չվերթեր են չեղարկվել
