Երևանի քաղաքապետարանն ստեղծել է տրանսպորտի վճարման թղթե QR տոմսերի այլընտրանքային բոլոր հնարավորությունները, օգոստոսի 4-ին կայացած ասուլիսում հայտարարել է փոխքաղաքապետ Սուրեն Գրիգորյանը՝ ներկայացնելով օգոստոսի 1-ից թղթե QR տոմսերը շրջանառությունից դուրս բերելու պատճառները։
Նա ընդգծել է, որ պատճառներից մեկը բնապահպանական խնդիրն է, ոը կարող էր առաջանալ մեծ քանակությամբ թուղթ օգտագործելու դեպքում։
Armenia Today-ի հարցին, թե ի՞նչ է նախատեսել քաղաքապետարանն այն մարդկանց, հատկապես թոշակառուների համար, ովքեր գումարի պատճառով քարտ ձեռք բերելու ցանկություն, նաև սմարտֆոն չունեն, Գրիգորյանը նշել է, որ իր համար անհասկանալի են նման պատճառաբանությունները։
Քաղաքացիներին, ովքեր սմարտֆոն չունեն, փոխքաղաքապետը խորհուրդ է տվել ձեռք բերել, օրինակ, տրանսպորտային քարտ, պարբերաբար այն լիցքավորել և օգտվել տրանսպորտից։
«Չեմ կարծում, որ սա այնքան դրամատիկ ծախս է, որ թոշակառուները լուրջ խնդիր ունենան։ Իրականում այնպես չէ, որ քաղաքապետարանը չէր կարող սուբսիդավորել քարտի այդ 500 դրամը։ Խնդիրն այլ տեղ է․ երբ քարտն անվճար է, մարդը ուշադիր չի վերաբերվում։ Վերցնելու է ու ամեն օր ասի՝ կորցրի, մի հատ էլ տվեք։ Այսինքն, մեր սահմանած այդ գումարը ոչ թե գումար աշխատելու միտում ունի, այլ, որ մարդիկ մի քիչ ուշադիր լինեն։ Բացի այդ, քարտը մեկ անգամ են ձեռք բերելու ու լիցքավորելու են այնքան, որքան անհրաժեշտ է»,- նշել է նա։
Գրիգորյանը նաև հայտարարել է, որ քաղաքապետարանի հսկիչներն այսուհետ ստուգելու են՝ քաղաքացին վճարե՞լ է տրանսպորտի համար, թե՞ ոչ։ Նա մանրամասնել է, որ ստուգումներն իրականացվելու են տրանսպորտային միջոցներում, հսկիչները շրջելու են համապատասխան սարքավորումներով։ Փոխքաղաքապետը վստահեցրել է, որ աշխատանքը լինելու է միջազգային ստանդարտի սահմաններում։
«Մենք տուգանքների միջոցով գումարի հավաքագրման խնդիր չենք ուզում լուծել։ Մենք պարզապես ուզում ենք, որ քաղաքացիները վճարեն նախատեսված ուղեվարձը։ Մենք այս օրերին տեսնում ենք, որ կան մարդիկ, ովքեր անտեղյակ են։ Այս օրերին, բնականաբար, մաքսիմալ տուգանելու և կոշտ մոտեցում չի լինելու։ Մենք պետք է հավաստիացած լինենք, որ մարդիկ դա չարամտորեն չեն իրականացնում»,- ընդգծել է Գրիգորյանը։
Նա նշել է, որ չարամտորեն, օրինակ, վավերականությունն անցած ժամկետով տոմսերով վճարելու միտումներ են արձանագրել, որոնք պետք է բացառել։
Օգոստոսի 1-ից Երևանում շրջանառությունից դուրս է բերվել տրանսպորտով երթևեկության համար թղթային տարբերակով վճարումը։ Հիմա տրանսպորտի համար հնարավոր է վճարել 3 տոմսային կրիչով, դրանք են՝ տրանսպորտային քարտը, անհպում բանկային քարտը և Telcell Wallet բջջային հավելվածը։
Կարդացեք նաև՝
«Բոյկոտում էի», «հիասթափված եմ», «քարտով հարմար է»․ քաղաքացիները՝ տրանսպորտի թղթային կտրոնների չեղարկման մասին
