ԱՄՆ-ն մեղմացնում է Սիրիայի նկատմամբ սահմանված պատժամիջոցները և արտահանման վերահսկողության միջոցառումները, հայտարարել է ԱՄՆ ֆինանսների նախարարության արտասահմանյան ակտիվների վերահսկողության գրասենյակը (OFAC):
«ԱՄՆ-ից քաղաքացիական ապրանքների, տեխնոլոգիաների և ծրագրային ապահովման մեծ մասի տեղափոխումը Սիրիա թույլատրվում է առանց լիցենզիայի»,- նշվում է փաստաթղթում:
Այնուամենայնիվ, ապրանքների մեծ մասի արտահանման համար դեռևս պահանջվում է OFAC լիցենզիա։ «Կեսարի օրենքը» նույնպես մասամբ կասեցվել է Սիրիայի համար, բացառությամբ՝ Ռուսաստանի և Իրանի հետ պատժամիջոցների տակ գտնվող գործարքների: Մեղմացումներն ուժի մեջ են մնալու 180 օր։
2019 թվականին ԱՄՆ նախագահ Դոնալդ Թրամփն ստորագրել էր գործադիր հրամանագիր, որով ընդլայնվում է այն երրորդ կողմերի նկատմամբ պատժամիջոցների շրջանակը, որոնք «խոչընդոտում են սիրիական հակամարտության քաղաքական լուծման հասնելուն»: 2020 թվականի հունիսին ուժի մեջ էր մտել «Կեսարի օրենքը», որը կոդավորում և ընդլայնում է Դամասկոսի դաշնակիցների նկատմամբ գործող սահմանափակումները։
Օրենքը թույլ է տալիս երկրորդական պատժամիջոցներ կիրառել օտարերկրյա քաղաքացիների և ընկերությունների նկատմամբ՝ Սիրիայի նախկին նախագահ Բաշար Ասադի ռեժիմին աջակցելու համար։
OFAC-ը հայտարարել է, որ Միացյալ Նահանգները կշարունակի վերանայել Սիրիայի՝ որպես «ահաբեկչության հովանավոր պետություն» որակումը։
Մեղմացումները կատարվել են Սիրիայի ժամանակավոր նախագահ Ահմեդ ալ-Շարաայի և Թրամփի միջև Սպիտակ տանը կայացած հանդիպումից հետո։ Reuters-ը հաղորդում է, որ բանակցություններն արդեն ավարտվել են, և ալ-Շարաան լքել է նախագահական նստավայրը։ Գործակալությունը պարզաբանում է, որ սա Սիրիայի նախագահի առաջին այցն է Միացյալ Նահանգներ։
Ալ-Շարաայի այցից առաջ Վաշինգտոնը նրան հանել էր ահաբեկչության հետ կապված անձանց ցուցակից: ՄԱԿ-ի Անվտանգության խորհուրդն ԱՄՆ-ի առաջարկով հաստատել էր Սիրիայի նախագահի դեմ պատժամիջոցների վերացումը։
