Երեք երկիր՝ Կանադան, Ավստրալիան և Մեծ Բրիտանիան, այսօր հայտարարել են Պաղեստին պետության ճանաչման մասին, գրում է «ՌԻԱ նովոստի»-ն։
«Այսօր, պաղեստինցիների և իսրայելցիների համար խաղաղության և երկու պետությունների լուծման հույսը վերականգնելու համար Լոնդոնը պաշտոնապես ճանաչում է Պաղեստին պետությունը»,- ասել է Մեծ Բրիտանիայի վարչապետ Քիր Սթարմերը:
Նա նաև ընդգծել է, որ «Իսրայելի կառավարության կողմից Գազայի հատվածի շարունակական և սրվող ռմբակոծությունը, վերջին շաբաթների հարձակումները, սովը և ավերածությունները բացարձակապես անտանելի են»: Սթարմերն ասել է, որ այս քայլը չպետք է դիտարկվի որպես պաղեստինյան ՀԱՄԱՍ խմբավորման համար պարգև:
«Մենք հստակեցնում ենք, որ այս որոշումը ՀԱՄԱՍ-ի համար պարգև չէ, քանի որ դա նշանակում է, որ ՀԱՄԱՍ-ը չի կարող որևէ ապագա, որևէ դեր ունենալ կառավարությունում կամ անվտանգության մեջ»,- ասել է նա։
Կանադայի վարչապետ Մարկ Քարնին հայտարարել է, որ Պաղեստինը ճանաչելու որոշումը կամրապնդի նրանց, ովքեր ձգտում են խաղաղ համակեցության և ՀԱՄԱՍ-ի գործունեության դադարեցման:
«Սա ոչ մի կերպ չի օրինականացնում կամ պարգևատրում այն»,- հավելել է նա:
«Ֆրանս Պրես» գործակալությունը, հղում անելով Ֆրանսիայի նախագահ Էմանուել Մակրոնի անանուն խորհրդականին, հուլիսին հաղորդել էր, որ տասը երկիր մտադիր է ճանաչել Պաղեստին պետությունը սեպտեմբերի 22-ին Նյու Յորքում կայանալիք ՄԱԿ-ի Գլխավոր ասամբլեայի շրջանակներում։
Պաղեստինի ազգային ինքնավարության (ՊԱԻ) նախագահ Մահմուդ Աբբասը ողջունել է Պաղեստին պետությունը ճանաչելու որոշումը՝ ասելով, որ դա կնպաստի «Պաղեստինի և Իսրայելի համակեցությանը՝ անվտանգության, խաղաղության և բարիդրացիության պայմաններում»։
Երեք երկրների կողմից ճանաչման մասին հայտարարությունից հետո Իսրայելի ազգային անվտանգության նախարար Իթամար Բեն-Գվիրը հայտարարել է, որ կառաջարկի երկրի կաբինետին Իսրայելի ինքնիշխանությունը տարածել Իսրայելի կողմից օկուպացված Արևմտյան ափի վրա։ Բեն-Գվիրը նաև հայտարարել է, որ Պաղեստինի ազգային ինքնավարությունը, որն Արևմտյան ափում սահմանափակ ինքնակառավարում ունի, պետք է լուծարվի։
Իսրայելի վարչապետ Բենիամին Նեթանյահուն ավելի ուշ հայտարարել է, որ Հորդանան գետից արևմուտք Պաղեստին պետություն չի ստեղծվի։ Նա նաև ասել է, որ Իսրայելը կրկնապատկել է Արևմտյան ափի հրեական բնակավայրերի շինարարությունը և «կշարունակի այս ճանապարհով»։
«Մեր երկրի կենտրոնում մեզ վրա ահաբեկչության պետություն պարտադրելու այս վերջին փորձի պատասխանը կտրվի Միացյալ Նահանգներից իմ վերադառնալուց հետո»,- ասել է նա։
1947 թվականին ՄԱԿ-ի Գլխավոր ասամբլեան ընդունել էր բանաձև, որով կոչ էր արվում նախկին բրիտանական մանդատի տարածքում ստեղծել երկու պետություն՝ մեկ հրեական և մեկ արաբական։ Դրան հետևել էին մի շարք պատերազմներ, որոնց արդյունքում Իսրայելը գրավել էր պաղեստինցիների համար նախատեսված հողերի մեծ մասը, այդ թվում՝ Արևմտյան Երուսաղեմը։
Պաղեստինի անկախության հռչակումը տեղի էր ունեցել միայն 1988 թվականին։ Այն բաղկացած է երկու էքսկլավից՝ Արևմտյան ափից և Գազայի հատվածից, որոնք բաժանված են իսրայելական տարածքով։
ՄԱԿ-ի Գլխավոր ասամբլեայի նստաշրջանում Հայաստանն աջակցել էր պաղեստինյան հարցի խաղաղ կարգավորման և հակամարտության երկու պետությունների լուծման վերաբերյալ Նյու Յորքի հռչակագրին հավանություն տվող բանաձևին։
2024-ի հունիսի 21-ին ՀՀ ԱԳՆ-ն հայտարարություն էր տարածել՝ տեղեկացնելով, որ Հայաստանի Հանրապետությունը ճանաչում է Պաղեստինը։
