Ռուսաստանն ու Ուկրաինան անմիջապես կսկսեն բանակցությունները հրադադարի և, որ ավելի կարևոր է, պատերազմի դադարեցման շուրջ, Ռուսաստանի նախագահ Վլադիմիր Պուտինի հետ հեռախոսազրույցից հետո հայտնել է ԱՄՆ նախագահ Դոնալդ Թրամփը։
«Պայմանները կհամաձայնեցվեն երկու կողմերի միջև, քանի որ դա հնարավոր է միայն այն պատճառով, որ նրանք գիտեն բանակցությունների մանրամասները, որոնց մասին ոչ ոք չգիտի: Զրույցի տոնն ու ոգին գերազանց էին»,- Truth Social-ում գրել է ԱՄՆ նախագահը։
Նա հավելել է, որ Վատիկանը հետաքրքրություն է հայտնել իր տարածքում բանակցություններ վարելու հարցում:
Թրամփը նաև նշել է, որ Ռուսաստանը ցանկանում է լայնածավալ առևտուր հաստատել Միացյալ Նահանգների հետ, «երբ ավարտվի այս աղետալի արյունալի սպանդը»։
Պուտինն ԱՄՆ նախագահի հետ զրույցից հետո հայտնել էր, որ Ռուսաստանը պատրաստ է աշխատել Ուկրաինայի հետ հրադադար ներառող հուշագրի շուրջ։
Այսօր Երևանի ժամանակով ժամը 18:00-ից Թրամփը և Պուտինը հեռախոսազրույց էին ունեցել։ Ըստ Կրեմլի մամուլի քարտուղար Դմիտրի Պեսկովի՝ զրույցի հիմնական համատեքստն Ստամբուլում Ուկրաինայի հետ տեղի ունեցած բանակցությունների արդյունքների վերլուծությունն էր։
Թրամփը Պուտինի հետ հեռախոսազրույցից առաջ խոսել էր Ուկրաինայի նախագահ Վլադիմիր Զելենսկու հետ։
