«Ռոսսելխոզնադզոր»-ը հուլիսի 18-ից ժամանակավոր սահմանափակումներ է մտցնում թուրքական հինգ արտահանող ընկերություններից կորիզավոր մրգերի ներկրման վրա, հայտնել են գերատեսչության մամուլի ծառայությունից։
Ըստ հրապարակման՝ սահմանափակումները վերաբերում են բալի, կեռասի, դեղձի, ծիրանի, սալորի և այլ կորիզավոր մրգերի մատակարարումներին։ Ծառայությունից պարզաբանել են, որ այս քայլը պայմանավորված է Թուրքիայից ներկրվող խմբաքանակներում ԵԱՏՄ երկրների համար կարանտինային համարվող վնասատուների հայտնաբերմամբ։
Տեսչական մարմինն ընդգծում է, որ սահմանափակումները կրում են հասցեական բնույթ և վերաբերում են բացառապես այն ընկերություններին, որոնց մոտ արձանագրվել են ֆիտոսանիտարական պահանջների ամենաշատ խախտումները։ Նախկինում գերատեսչությունը բազմիցս հայտնաբերել է թուրքական կորիզավոր մրգերում վնասատուներ, որոնք բարձր ֆիտոսանիտարական ռիսկ են ներկայացնում Ռուսաստանի և ԵԱՏՄ անդամ մյուս պետությունների համար, նշել է պաշտոնական կայքը։
«Ռոսսելխոզնադզոր»-ը հունիսին հայտարարել էր, որ ամեն ամիս մշտադիտարկում է իրականացնելու Հայաստանից ռուսական շուկա մատակարարվող արտադրանքի նկատմամբ։
Մայիսի վերջից և հունիսի սկզբից գերատեսչությունն արգելել էր Հայաստանից ծաղիկների, մրգերի, բանջարեղենի և չրերի ներմուծումն ու տարանցումը ՌԴ, ինչպես նաև պահանջել էր կասեցնել ձկնամթերքի և ձկան անասնաբուժական սերտիֆիկատների ձևակերպումը և հայտնել անորակ ալկոհոլային արտադրանքի հայտնաբերման մասին։ Սահմանափակումները կգործեն մինչև հայկական կողմը մշակի անվտանգության ապահովման համապատասխան ընթացակարգ։
Կարդացեք նաև՝
Ծաղիկները սպասում են ընտրություններին
