Կառավարությունը սահմանել է Եվրոպական միության առևտրի վերահսկման և փորձագիտական համակարգում (TRACES) գրանցման համար ձկնաբուծական տնտեսություններին, ձկնամթերքի արտադրական կազմակերպություններին կամ ձկան ու ձկնամթերքի պահպանում իրականացնող ընկերություններին ներկայացվող կոնկրետ պահանջները։ Համապատասխան որոշումն ընդունվել է գործադիրի նիստում։
Որոշման մեջ նշվում է, որ 2025 թվականի մարտի 16-ից Հայաստանը պաշտոնապես թույլտվություն է ստացել ջրային կուլտուրաների` թեփուկավոր ձկների և դրանց արտադրանքը արտահանել ԵՄ երկրներ։ Արտահանման իրավունք ստանալու համար տնտեսավարողները պարտադիր պետք է գրանցված լինեն TRACES համակարգում։ Քանի որ նախկինում ներպետական օրենսդրությամբ բացակայում էին ԵՄ կանոնակարգերին համապատասխան պահանջները, ընդունված կարգավորմամբ եվրոպական չափանիշները տեղայնացվում են ազգային օրենսդրության մեջ։ Սա Սննդամթերքի անվտանգության տեսչական մարմնին (ՍԱՏՄ) իրավական հիմք կտա ստուգումներ իրականացնել արտահանման հայտ ներկայացրած ընկերությունների մոտ։
Կառավարության մեկ այլ որոշմամբ՝ սահմանվել է հենց TRACES համակարգում տնտեսավարող սուբյեկտի գրանցման, գրանցումը դադարեցնելու և առողջության սերտիֆիկատ տալու ընթացակարգը։ ՍԱՏՄ-ն կլինի այն լիազոր մարմինը, որը կիրականացնի նախնական ստուգումները, տվյալների գրանցումն ու համապատասխան սերտիֆիկատների տրամադրումը։
Որոշումների ընդունումը պետական բյուջեից լրացուցիչ ֆինանսական միջոցներ չի պահանջում։ Այս քայլերն ուղղված են հայկական ձկնամթերքի արտահանման շուկաների դիվերսիֆիկացմանը, ծավալների ավելացմանը և տեղական արտադրության արդիականացմանը՝ միջազգային ստանդարտներին համապատասխան։
Հունիսին ՌԴ-ն կասեցրել էր Հայաստանից ձկնամթերքի ներմուծումը։ Այս ֆոնին ՀՀ իշխանությունները հայտարարել էին այլ երկրներ արտահանման հնարավորության և ՌԴ սահմաններից վերադարձվող ապրանքների սուբսիդավորման մասին։ Միաժամանակ, Երևանից ընդգծել էին, որ նպատակ չունեն ռուսական շուկայից արտահանումը վերաուղղել դեպի Եվրոպա։
«Ռոսսելխոզնադզորն» արգելել էր նաև Հայաստանից ծաղիկների, մրգերի, բանջարեղենի և չրերի ներմուծումն ու տարանցումը ՌԴ, պահանջել կասեցնել ձկնամթերքի և ձկան անասնաբուժական սերտիֆիկատների ձևակերպումը և հայտնել անորակ ալկոհոլային արտադրանքի հայտնաբերման մասին։ Սահմանափակումները կգործեն մինչև հայկական կողմը մշակի անվտանգության ապահովման համապատասխան ընթացակարգ։
