Ֆուտբոլի աշխարհի առաջնության կիսաեզրափակչում Անգլիայի հավաքականի պարտությունից հետո Լոնդոնի ոստիկանությունը կանխել է անգլիացի զայրացած երկրպագուների հարձակումն Արգենտինայի հավաքականի երկրպագուի վրա, հայտնում է ՌԲԿ-ն։
Միջադեպը տեղի է ունեցել Լոնդոնում՝ Անգլիա-Արգենտինա խաղից հետո, որն ավարտվել էր արգենտինացիների կամային հաղթանակով՝ 2:1 հաշվով։ Անգլիացիները հաշվի մեջ առաջ էին անցել 55-րդ րոպեին՝ Էնթոնի Գորդոնի գոլի շնորհիվ, սակայն խաղավերջում երկու գնդակ էին ընդունել սեփական դարպասը. 85-րդ րոպեին հեռահար հարվածով հաշիվը հավասարեցրել է Էնցո Ֆերնանդեսը, իսկ 92-րդ րոպեին Լաուտարո Մարտինեսը հաղթանակ էր պարգևել Արգենտինային։
Հրապարակված կադրերում երևում է, թե ինչպես են անգլիացի երկրպագուները շրջապատում Արգենտինայի հավաքականի մարզաշապիկով տղամարդուն, որից հետո ոստիկաններն օպերատիվորեն միջամտում են, հետ մղում ամբոխին և նրան տեղափոխում իրենց ավտոմեքենա:
Անգլիացի երկրպագուների հուսահատությունը դրսևորվել է ոչ միայն Լոնդոնում, այլև այլ քաղաքներում։ Ավելի վաղ հաղորդվել էր Ատլանտայի մարզադաշտի հարակից տարածքում տեղի ունեցած բախումների մասին, որտեղ ոստիկանությունը մի քանի ձերբակալություն էր իրականացրել, ինչպես նաև Բիրմինգհեմում և Նյու Յորքում գրանցված ծեծկռտուքների մասին։
Եզրափակչում Արգենտինայի հավաքականը կհանդիպի Իսպանիայի հետ։ Խաղը կկայանա հուլիսի 19-ին։ Անգլիան երրորդ տեղի համար պայքարում հուլիսի 18-ի լույս 19-ի գիշերը կխաղա Ֆրանսիայի դեմ։
