Թուրքիան համաձայն է ստանձնել Ուկրաինայի անվտանգության երաշխիքների ռազմածովային բաղադրիչի ղեկավարումը պոտենցիալ խաղաղ համաձայնագրի շրջանակներում, Կիևում Ուկրաինայի ԱԳ նախարար Անդրեյ Սիբիգայի հետ համատեղ մամուլի ասուլիսի ժամանակ հայտարարել է Թուրքիայի արտաքին գործերի նախարար Հաքան Ֆիդանը։
«Թուրքիան համաձայնել է գլխավորել ծովային բաղադրիչը, և մենք մեր դաշնակիցների հետ ունենք այս հարցի ընդհանուր փոմբռնում։ Համապատասխան դաշնակից երկրների ռազմածովային ուժերի կողմից իրականացվում է նաև այս հարցի պլանավորումը»,- նշել է նա։
Թուրքիայի արտաքին գործատեսչության ղեկավարը նաև կոչ է արել թույլ չտալ ռազմական գործողությունների ընդլայնում Սև ծովում։ Նրա ձևակերպմամբ՝ Անկարան չի ցանկանում, որ պատերազմը տարածվի Սև ծովի վրա, իսկ նավահանգիստների, տանկերների ու ձկնորսական նավերի հրետակոծությունները և խաղաղ բնակիչների կյանքին սպառնացող վտանգներն անընդունելի են։
Բացի այդ, Ֆիդանն առաջարկել է վերսկսել ռուս-ուկրաինական բանակցությունները Ստամբուլում։
Ուկրաինական ճգնաժամի կարգավորման շուրջ ՌԴ-ԱՄՆ-Ուկրաինա բանակցությունների երրորդ փուլը տեղի էր ունեցել Ժնևում: Հանդիպումը տևել էր 6 ժամ և, ըստ հանդիպմանը քաջատեղյակ աղբյուրի, շատ լարված էր ընթացել: Շփումները կրել էին ինչպես երկկողմ, այնպես էլ եռակողմ բնույթ. երկխոսությունն ընթացել էր ռուս-ամերիկյան, ռուս-ուկրաինական և ռուս-ամերիկյան-ուկրաինական բանակցությունների ձևաչափով:
Հաջորդ փուլը նախատեսված էր մարտի 5-ին՝ Աբու Դաբիում, սակայն հետաձգվել էր Իրանին ԱՄՆ-Իսրայելի հարվածներից հետո։ Մարտի 15-ին Կրեմլը հայտարարել էր բանակցություններում դադարի մասին։
