Էջմիածնի համայնքապետարանի աշխատակիցները նոյեմբերի 16-ի ՏԻՄ ընտրություններից առաջ այցելում են տեղի արցախցիներին, ծանոթանում նրանց խնդիրներին, գրել է «Հրապարակ» օրաթերթը՝ հղում անելով իր աղբյուրներին։
Ըստ թերթի՝ նախկին համայնքապետ Դիանա Գասպարյանն ու ներկայիս ժամանակավոր պաշտոնակատար Արգիշտի Մեխակյանն առանձնապես ուշադիր չէին տեղահանված արցախցիների նկատմամբ այն դեպքում, երբ Էջմիածնում, ըստ վիճակագրության, արցախցիների ամենամեծ խումբն է բնակություն հաստատել։
Լրատվականը հիշեցրել է, որ միայն Էջմիածնում, ոչ պաշտոնական հաշվարկով, 3 հազարից ավելի արցախցի կա՝ չհաշված մյուս համայնքները:
Մեխակյանը բնակիչների հետ հանդիպման անվան տակ նախընտրական քարոզչություն է արել, որին 80-100 մարդ է մասնակցել։ Նա լսել է բնակիչներին, խոստացել լուծել խնդիրները։
ՏԻՄ օրենքի համաձայն՝ 6 ամիս առաջ տվյալ համայնքում ժամանակավոր կացություն հաստատած անձինք կարող են քվեարկել:
Ավելի վաղ մամուլը գրել էր, որ Մեխակյանը չի արդարացրել վարչապետ Նիկոլ Փաշինյանի հույսերն Ամենայն Հայոց կաթողիկոսի դեմ «մարդ հավաքելու» գործում։ Ըստ մամուլի՝ մարզի ընդդիմադիր շրջանակները կարծում են, որ մեծ շանսեր ունեն հաղթելու նոյեմբերի 16-ին նշանակված ՏԻՄ ընտրություններում, եթե լավ պատրաստվեն:
