Իվանյանի դեպքերի պատասխանատուն հենց ադրբեջանական կողմն է, ինչը ներիշխանական պայքարի արդյունք էր, հայտարարել է Արցախի Հանրապետության արտաքին գործերի նախկին նախարար Դավիթ Բաբայանը՝ Բաքվի բանտից 168.am-ին իր ընտանիքի միջոցով փոխանցած հեռախոսային ձայնագրության միջոցով։
Բաբայանը սուտ է որակել ադրբեջանական ԶԼՄ-ների տարածած տեղեկությունները, կապված, այսպես կոչված, «Խոջալուի ցեղասպանության» վերաբերյալ իր ցուցմունքների հետ։ Ադրբեջանական ԶԼՄ-ները գրել էին, թե իբր Բաքվի դատարանում հարցաքննության ժամանակ Բաբայանը հայտարարել է, որ «ինքը չի մասնակցել այդ իրադարձություններին, և գործողության մեջ ներգրավված էին տարբեր խմբեր»։ Ադրբեջանական ԶԼՄ-ները նաև նշել էին, թե իբր Բաբայանն ասել է, որ «Արցախի իշխանությունները նույնիսկ «Խոջալուի (Իվանյան-խմբ․) ազատագրման համար» մեդալ են սահմանել»։
«Ուզում եմ դիմել բոլորիդ ու ասել՝ մի՛ անհանգստացեք, ամեն ինչ նորմալ է մեզ հետ: Տեղի լրատվամիջոցներով տեղեկություն է տարածվել 1992թ. Իվանյանի դեպքերի վերաբերյալ իմ ասածի լրիվ հակառակի մասին: Նրանք մեկնաբանել են մի ձև, ես ասել եմ լրիվ հակառակ բան: Բացի դրանից, երբեք չեմ ասել, որ գոյություն ունի Իվանյանի ազատագրման համար պարգև: Դա նույնպես սխալ է ձևակերպված: Վաղը դատական նիստի ժամանակ դրա մասին բարձրաձայնելու եմ»,- ասել է Բաբայանը։
Նշենք, որ Բաքվում դատերն ընթանում են անկախ աղբյուրների, միջազգային կազմակերպությունների, իրավապաշտպանների բացակայության պայմաններում, և անկախ աղբյուրներից ստուգել դատավարության մասին ադրբեջանական ԶԼՄ-ների փոխանցած տեղեկությունները՝ հնարավոր չէ:
Դավիթ Բաբայանը ձայնագրության մեջ անդրադարձել է նաև իրենց՝ Բաքվում ապօրինի պահվող գերիների վիճակին՝ ասելով. «Ընդհանուր առմամբ՝ նորմալ ենք: Շատ լավ են վերաբերվում, հատկապես՝ մեկուսարանում: Որևէ խնդիր չունենք: Մի անգամ նույնիսկ վատ խոսք չեն ասել, սուր հայացք չեն նետել մեր ուղղությամբ: Ամեն ինչ նորմալ է նաև դատարանում: Ավելին, եթե նորմալ չլիներ, այսպիսի քննարկումներ չէինք անի: Շատ թեժ է երբեմն անցնում, բայց միշտ քաղաքակրթության սահմաններում: Մնացած ամեն ինչ նորմալ է: Իհարկե, շատ ենք կարոտում մեր ընտանիքներին: Իհարկե, շատ ենք մտահոգված մեր հայ ազգի ճակատագրի մասին, գիշեր-ցերեկ մտածում ենք, բայց ամեն ինչ նորմալ պիտի լինի։ Վաղը Հայոց Մեծ եղեռնի 110-րդ տարելիցն է: Հոգով-մտքով ձեզ հետ ենք: Հոգով-մտքով ես լինելու եմ նաև Ծիծեռնակաբերդում: Լա՛վ եղեք, պի՛նդ եղեք, մեր մասին մի՛ մտածեք»:
Ադրբեջանում, պաշտոնական տվյալներով, 23 հայ գերի կա։ 2024-ի դեկտեմբերին Բաքուն դատարան է ուղարկել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին սկսվել են Արցախի առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, պետնախարար Ռուբեն Վարդանյանը, ԱԺ նախագահ Դավիթ Իշխանյանը, արտգործնախարար Դավիթ Բաբայանը, պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Ռուբեն Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
Արցախի նախկին պետնախարար Արտակ Բեգլարյանը մարտի 13-ին Armenia Today-ի հետ զրույցում կարծիք էր հայտնել, որ 2023 թվականի սեպտեմբերից Հայաստանի իշխանությունները կտրուկ նվազեցրել են Բաքվում ապօրինաբար դատվող հայ գերիներին և Արցախի առաջնորդներին ազատ արձակելու ջանքերի մակարդակը։
Կարդացեք նաև՝
«Մարդու իրավունքների կոպիտ խախտում». միջազգային դիտորդը՝ Բաքվում հայերի դատավարության մասին
