Աշխատանքի և սոցիալական հարցերի նախարար Նարեկ Մկրտչյանը խորհրդարանում մեկնաբանել է Հայաստանի իշխանությունների՝ Արցախից տեղահանվածներին օգնությունը կրճատելու մասին հարցը։
Մկրտչյանը նշել է, որ վարձավճարների փոխհատուցման ծրագրի շարունակությունը կարող է խոչընդոտներ ստեղծել արցախցիների համար՝ մասնակցելու իրենց բնակարանով ապահովելու կառավարության ծրագրին։
«Երբ մենք նրանց անընդհատ կախվածության մեջ ենք պահում այս վարձավճարի՝ կեցության համար ծրագրից, նաև արհեստական խոչընդոտ ենք ստեղծում, որպեսզի մարդիկ ավելի արագ և ինտենսիվ ներառվեն մեր աջակցության երկարաժամկետ ծրագրերում»,- ասել է նա:
Նախարարի խոսքով՝ կառավարությունը բնակարանի ապահովման ծրագրի շրջանակներում 4 անձից բաղկացած ընտանիքներին առաջարկում է մինչև 20 միլիոն դրամ արժողությամբ բնակարան գնել ավելի քան 400 համայնքում։ Մկրտչյանը նշել է, որ վարձավճարների փոխհատուցման աջակցությունը նվազեցնելով՝ իշխանությունները բռնի տեղահանվածներին ուղերձ են հղում դառնալ բնակարանային ապահովության ծրագրի շահառու։ Նախարարը հայտնել է, որ իշխանությունները ծրագրում են աջակցություն տրամադրել «թիրախային խմբերին»:
Նա նշել է, որ իշխանություններն «ակտիվ աշխատում են» բռնի տեղահանվածների հետ՝ նրանց «դեպի աշխատանք ուղղորդելու» նպատկով։ Մկրտչյանը նշել է, որ տեղահանվածներից շուրջ 25 հազարն արդեն աշխատանք ունի, այդ թվում՝ բիզնեսի ոլորտում։ Ըստ նրա՝ դա նշանակում է, որ կառավարության ծրագրերն այժմ պետք է ավելի թիրախային լինեն։
«Մենք չենք կարող անընդհատ զուգահեռ երկարաժամկետ բնակապահովության ծրագիր մշակենք, իրականացնենք և ասենք, որ շարունակ պետք է ստանաք այդ 50 հազար դրամը և ձեր վարձավճարին ուղղեք»,- ասել նա։
2025 թվականի հունվարի 1-ից Հայաստանում անշարժ գույք ունեցող 4899 արցախցի բռնի տեղահանվածներ այլևս չեն ստանում «40+10» ծրագրով նախատեսված 10 հազար դրամը (40 հազար դրամ բնակարանի վարձի փոխհատուցում և 10 հազար դրամ՝ կոմունալ վարձերի փոխհատուցում)։ Հատկացվող գումարի չափն աստիճանաբար կնվազի՝ 2025 թվականի հունվարից մարտ կկազմի 50 հազար դրամ, ապրիլից հունիս՝ 40 հազար դրամ, իսկ 2025 թվականի հուլիսից դեկտեմբեր՝ 30 հազար դրամ։
Ապրիլի 1-ից աջակցություն կստանան խոցելի հետևյալ խմբերին դասվող անձինք՝ մինչև 18 տարեկանները կամ հանրակրթական ուսումնական հաստատություններում կամ նախնական մասնագիտական (արհեստագործական) կամ միջին մասնագիտական ուսումնական հաստատությունում սովորող 18 տարին լրացած անձանց (շուրջ 33 000 մարդ), 63 և ավելի տարեկան անձինք (շուրջ 18 000 մարդ), կերակրողին կորցնելու դեպքում նպաստ կամ կենսաթոշակ ստացող կամ 1-ին կամ 2-րդ խմբի հաշմանդամություն ունեցող կամ ֆունկցիոնալության սահմանափակման խորը կամ ծանր աստիճան ունեցող անձանց (շուրջ 2600 մարդ):
Արցախի ՄԻՊ Գեղամ Ստեփանյանի խոսքով՝ Լեռնային Ղարաբաղից բռնի տեղահանվածներին «40+10» աջակցության ծրագիրն ապրիլից միայն հատուկ խմբերի համար շարունակելու մասին Հայաստանի իշխանությունների որոշումը չի քննարկվել Արցախի կառավարության և խորհրդարանի ներկայացուցիչների հետ։
Կարդացեք նաև՝
«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն
