Հայաստանի իշխանությունները՝ Արցախի նախկին զինվորականների դեմ հարուցված գործերի կամ արցախցի զինվորականներից բնակարանների առգրավման գործընթացի շրջանակներում, պահանջել են վերադարձնել Պաշտպանության նախարարության ծառայողական բնակարանը, գրում է «Հրապարակ» թերթը՝ հղում անելով իր աղբյուրներին։
Խոսքն Արցախի նախկին զինվորական, 2-րդ խմբի հաշմանդամություն ունեցող Վլադիկ Խաչատրյանի մասին է։ Բնակարանը նրան պետության կողմից որպես ծառայողական կացարան էր հատկացվել 20 տարի ծառայելու համար և այն նրա միակ կեցավայրն է։
Պարբերականի տվյալներով՝ բնակարանը պետությանը վերադարձնելու անհրաժեշտության մասին ծանուցումներ ստանում են Արցախի Պաշտպանության բանակի նախկին հրամանատար Միքայել Արզումանյանին մոտ կանգնած զինվորականները, ինչպես նաև նրանք, ովքեր չեն հասցրել սեփականաշնորհել իրենց հատկացված բնակարանները։
Զինծառայողներին հատկացված ծառայողական բնակարանային ֆոնդը պետությանը վերադարձնելու գործընթացի հետ կապված պահանջների մասին մամուլի ասուլիսի ժամանակ հայտնել էր փաստաբան Ռոման Երիցյանը։ Նրա տեղեկություններով՝ միայն վերջին շաբաթվա ընթացքում նման ծանուցումներ է ստացել 12 զինծառայող։
