Կառավարությունը փետրվարի 19-ի նիստում հաստատել է 2021 թվականի արտահերթ խորհրդարանական ընտրություններում շեմը հաղթահարած քաղաքական ուժերին 2026 թվականի պետական բյուջեից տրվող աջակցության չափերը: ԱԺ ընտրություններում շեմը հաղթահարած կուսակցություններն ու դաշինքները պետական բյուջեից կստանան ավելի քան 520 միլիոն դրամ:
Ըստ հաստատված որոշման՝ «Քաղաքացիական պայմանագիր» կուսակցությանը կհատկացվի 268 միլիոն դրամ, «Հայաստան» դաշինքին՝ 163 միլիոն դրամ, «Բարգավաճ Հայաստանին»՝ 50 միլիոն դրամ, իսկ «Հանրապետությանը»՝ 38 միլիոն դրամ:
Աջակցության գումարները կփոխանցվեն հավասար մասերով՝ եռամսյակային և կիսամյակային պարբերականությամբ:
2021 թվականի հունիսի 20-ին կայացած արտահերթ խորհրդարանական ընտրություններին ՔՊ-ն ստացել էր ձայների 53,91%-ը, «Հայաստան» դաշինքը, որը գլխավորում էր նախկին նախագահ Ռոբերտ Քոչարյանը, ստացել էր ձայների 21,09%-ը։
Գագիկ Ծառուկյանի «Բարգավաճ Հայաստան» կուսակցությունն ստացել էր ձայների 3,95 տոկոսը, Արամ Սարգսյանի առաջնորդած «Հանրապետությունը»՝ 3,03%: Այս երկու ուժը չէին հաղթահարել խորհրդարան մտնելու շեմը։
«Պատիվ ունեմ» դաշինքը՝ ԱԱԾ նախկին տնօրեն Արթուր Վանեցյանի գլխավորությամբ, չէր հաղթահարել դաշինքների համար սահմանված 7%-անոց անցողիկ շեմը, սակայն խորհրդարանում ներկայացված է վեց պատգամավորով, քանի որ օրենքով՝ ԱԺ-ում պարտադիր պետք է ներկայացված լինի առնվազն երեք քաղաքական ուժ՝ անկախ նրանից՝ երրորդ ուժը հաղթահարե՞լ է ընտրական շեմը, թե՞ ոչ։
