«Բարգավաճ Հայաստան» կուսակցության առաջնորդ, Հայաստանի ազգային օլիմպիական կոմիտեի նախագահ Գագիկ Ծառուկյանը չի բացառել 2026 թվականի խորհրդարանական ընտրություններին մասնակցելու հնարավորությունը։
«Ընտրություններին դեռ երկար ժամանակ կա ու դեռ շատ բան կարող է փոխվել։ Բայց եթե մասնակցեմ, մասնակցելու եմ մի ծրագրով, որը կոչվելու է «Առաջարկ Հայաստանին»,- «Կենտրոն հեռուստաընկերությանը» տված հարցազրույցում հայտնել է ԱԺ նախկին պատգամավորը։
Միևնույն ժամանակ, Ծառուկյանը նշել է, որ չի հավակնում որևէ պաշտոնի, այդ թվում՝ վարչապետի։
«Ամեն ինչի հասած մարդ եմ, ինձ համար պաշտոնը կարևոր չէ։ Ես վարչապետի պաշտոնի հավակնություն չունեմ։ Ուզում եմ՝ իմ երկիրը հզոր լինի, որ նոր սերունդը խեղճացած ու պարտված մթնոլորտում չապրի»,- շեշտել է նա։
Ծառուկյանի խոսքով՝ «ժողովուրդը հոգնել և հիասթափվել է հին ու նոր կռիվներից»։
«Մարդիկ մտահոգ են իրենց երկրի, էս խեղճության, պարտության, երկրի անվտանգության ու երեխաների ապագայի համար։ Մարդիկ ուզում են լիարժեք լավ ապրել։ Ցանկացած ոլորտում կան խնդիրներ, որոնցում պետք է շտկումներ անել, ուղղություններ տալ»,- ընդգծել է նա։
Ծառուկյանն իր հարցազրույցում անդրադարձել է նաև հայ-ռուսական հարաբերություններին` նշելով, որ ՌԴ-ի հետ հարաբերությունները բարեկամական պետք է մնան։
«ՌԴ-ի հետ մեր հարաբերությունները չպետք է փոխենք։ Պարզ է՝ հարց ունենք ՌԴ-ի հետ, բայց Ռուսաստանն էլ մեզ հետ հարց ունի։ Դրա համար պետք է կլոր սեղանի շուրջ նստենք, քննարկենք ավտանգության ապահովման, տնտեսության զարգացման հարցերը։ Պետք նաև շուկայի ընդլայնման հարցը քննարկենք։ Հիմա կան մարդիկ՝ դատարկ խոսում են, ասում՝ ՌԴ-ի հետ շուկաները փակենք, նոր շուկաներ բացենք։ Հետաքրքիր է՝ նման մարդիկ կյանքում շուկա բացած կա՞ն։ ՌԴ-ն ծանոթ է մեր շուկային, մեր ժողովրդին, մենք կապեր ունենք Ռուսաստանի հետ և պետք է ընդլայնենք շուկաները»,- հավելել է Ծառուկյանը։
