Ռուսաստանը կշարունակի ներդրումները Հայաստանի երկաթուղային ենթակառուցվածքներում, և դա է ապահովում անխափան աշխատանքը, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով վարչապետ Նիկոլ Փաշինյանի դիտարկումները տարածաշրջանային երթուղիների մրցունակության վերաբերյալ։
Հայաստանի կառավարության ղեկավարն ավելի վաղ կասկածի տակ էր առել գործող երկաթուղային ուղիների արդյունավետությունը՝ շեշտը դնելով նոր և ավելի մրցունակ լոգիստիկ նախագծերի անհրաժեշտության վրա։ Նա նշել էր, որ մեր սեփականությունը հանդիսացող երկաթուղու՝ ՌԴ-ի երկաթուղիների կառավարման ներքո գտնվելու փաստը բերում է ՀՀ մրցակցային առավելությունների կորստի, որի համար պետք է քայլեր ձեռնարկել։
Ռուսաստանի արտաքին քաղաքական գերատեսչության ներկայացուցիչը հիշեցրել է, որ Հայաստանի երկաթուղային ցանցն ավելի քան քսան տարի գտնվում է ռուսական ընկերության կառավարման ներքո։
Ըստ նրա՝ ռուսական կողմը կայուն կերպով կատարում է համաձայնագրերի բոլոր պայմանները և շարունակում միջոցներ ուղղել ենթակառուցվածքների զարգացմանը։ Զախարովան ընդգծել է, որ հենց այս ներդրումներն են թույլ տալիս պահպանել և ձևավորել երկաթուղու մրցակցային առավելությունները։
ԱԳՆ ներկայացուցիչը հավելել է, որ Մոսկվայի դիրքորոշումն ավելի վաղ հնչեցրել է ՌԴ փոխվարչապետ Ալեքսեյ Օվերչուկը, և ռուսական կողմը մտադիր է հավատարիմ մնալ այդ գծին։
2025 թվականի դեկտեմբերին ՀՀ վարչապետ Նիկոլ Փաշինյանը հայտարարել էր, որ Հայաստանը դիմել է Ռուսաստանին՝ Թուրքիայի և Ադրբեջանի հետ սահմանին գտնվող երկաթուղային հիմնական հատվածները վերականգնելու խնդրանքով։ Հունվարի 29-ին նա հայտարարել էր, որ ՀՀ կառավարությունը մտադիր է խորացնել համագործակցությունը ռուս գործընկերների հետ՝ Հարավային Կովկասում տարածաշրջանային հաղորդակցություններն ապաշրջափակելու համար։
Օվերչուկի փոխանցմամբ՝ Մոսկվան և Երևանը բանակցություններ կսկսեն Հայաստանի երկաթուղիների երկու հատվածի վերականգնման շուրջ, որոնք կապված են Ադրբեջանի և Թուրքիայի հետ:
ՏԿԵ նախարար Դավիթ Խուդաթյանը հայտարարել էր, որ երկաթգծի Իջևան և Ախուրիկ հատվածների կառուցումը նախատեսվում է իրականացնել ռուսական կողմի միջոցով։
