ՀՀ-ն ՌԴ-ին խնդրել է շտապ զբաղվել երկաթուղու՝ Երասխ-Նախիջևան և Ախուրիկ-Թուրքիա մասի ամբողջական վերականգնմամբ, դեկտեմբերի 18-ին լրագրողներին հայտնել է ՀՀ վարչապետ Նիկոլ Փաշինյանը։
Նա նշել է, որ նույն հարցը կբարձրացնի նաև Իջևան-Ղազախ հատվածի հետ կապված, որովհետև այն նույնպես հնարավորինս արագ վերականգնելու անհրաժեշտություն կա։
Մոսկվան դեկտեմբերի 16-ին հայտարարել էր, որ պատրաստ է խորհրդակցել Երևանի հետ «Թրամփի ուղու» պարամետրերի և նախաձեռնությանը Ռուսաստանի հնարավոր մասնակցության վերաբերյալ։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նախատեսվում է ստեղծել Սյունիքով անցնող ճանապարհ, որն ապաշրջափակվելու է TRIPP ծրագրով։ Երթուղին պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։
