«Ապրելու երկիր» կուսակցության համահիմնադիր Մանե Թանդիլյանը հայտարարել է, որ իրեն կեղծ օգտահաշիվներից սպառնալիքներ են ուղարկում։ Նա այս մասին լրագրողներին պատմել է Փարաքար համայնքում՝ սպանված համայնքապետ Վալոդյա Գրիգորյանի տան մոտ։
«Քաղաքական մոտիվները ես չգիտեմ, ինձ էլ են սպառնալիքներ են ուղարկում, նաև այսօր՝ այս դեպքի հետ կապված։ Իրավապահները տեղում չեն, զբաղված են դատավարություններով, որոնք անպատեհ են ու ընդհանրապես կապ չունեն հանցագործությունների հետ, բոլորս ականատես ենք լինում այդ բեմականացմանը, բայց իրական հանցագործները փողոցում են անօրինական զենքով քայլում, թող զբաղվեն իրենց գործով»,- ասել է նա։
Թանդիլյանի խոսքով՝ եթե անգամ իրավապահները շրջանառում են հաշվեհարդարի վարկածը, ապա դա ոչնչով չի տարբերվում սովորական մարդկանց վարկածներից, մինչդեռ իրավապահը պետք է մասնագիտական գործունեություն ծավալի:
«Եվ նորից ուզում եմ ասել, որ այդ քննիչն էլ, մնացածներն էլ իրենց տեղում չեն, եթե մեզ նման, ինչպես ես և դուք վարկածներ ենք մտածում, նույնպես իրենք են զբաղված, իրենց գործը վարկածներ մտածելը չի, այլ դրանք պատշաճ կերպով ու ժամանակին, և հիմա էլ կրկնում եմ, ժամանակին, անգամ եթե նման վարկած ունեն, առավել ևս պիտի այնպիսի քայլեր ձեռնարկեն, որ նման շարունակություն չունենա»,- նշել է նա։
Քաղաքական գործչի խոսքով՝ երկրի վարչապետ Նիկոլ Փաշինյանը պետք է իրավապահ համակարգին գործի դնի, քանի որ նրանք ղեկավարվում են ուղիղ իր կողմից։
«Առավոտ մարդիկ արթնանում, տեսնում են՝ Փաշինյանն ինչ ստատուս է գրել, սա հայտարարություն չի, թող իրավապահ համակարգին գործի դնի, որովհետև հասկանում ենք, որ մեկ մարդու իշխանություն ենք, և օր առաջ այս սպանությունը բացահայտեն։ Իրավապահ համակարգը պիտի իր գործով զբաղվի, իմանան, որ չեն մարսելու, այս իշխանությունը փոխվելու է, ժողովուրդ, իշխանությունները ժամանակավոր են»,- շեշտել է նա։
Սեպտեմբերի 24-ի գիշերը ՆԳՆ-ն հայտնել էր Գրիգորյանի և քրեական ոստիկան Կարեն Աբրահամյանի սպանության, ինչպես նաև քաղաքացի Արծրուն Գալստյանի վիրավորվելու մասին: Գրիգորյանը Փարաքարի ղեկավար էր ընտրվել մարտին կայացած ընտրությունների արդյունքներով։ Նա առաջադրվել էր ընդդիմադիր «Միասնություն» դաշինքից, որի կազմում էին «Ապրելու երկիր» և «Հաղթանակ» կուսակցությունները։
2025թ․ փետրվարի 5-ի գիշերը զինված հարձակում էր տեղի ունեցել Մերձավանի ղեկավար Մհեր Ախտոյանի տան ուղղությամբ, զոհվել էր նրա հորաքրոջ որդին, վիրավորվել՝ ընկերը: Հարուցված քրեական գործի շրջանակում կալանավորվել էր նաև Գրիգորյանի եղբայրը՝ 37-ամյա Պայքար Գրիգորյանը։
