«Հայաստանի պետական հետաքրքրությունների հիմնադրամ» ՓԲԸ-ի (ԱՆԻՖ) նախկին տնօրեն, «Սի Էֆ Դաբլյու» ՓԲԸ խորհրդի նախագահ Դավիթ Փափազյանի նկատմամբ միջազգային հետախուզում է հայտարարվել, Armenia Today-ին հայտնել են ՀՀ քննչական կոմիտեից։
Փափազյանի նկատմամբ դատախազությունը քրեական վարույթ էր հարուցել օգոստոսի 15-ին՝ Քրեական օրենսգրքի 457-րդ հոդվածի 2-րդ մասի (մի խումբ անձանց կողմից փաստաթղթեր կեղծելը, առավելագույն պատիժը՝ 3 տարվա ազատազրկում), 277-րդ հոդվածի 2-րդ մասի 2-րդ կետի (մասնավոր ոլորտում ծառայողական լիազորությունները կամ դրանցով պայմանավորված ազդեցությունը չարաշահելը, առավելագույն պատիժը՝ 4 տարվա ազատազրկում) և 296-րդ հոդվածի 3-րդ մասի 2-րդ և 3-րդ կետերի (փողերի լվացումը, առավելագույն պատիժը՝ 12 տարվա ազատազրկում) հատկանիշներով։
2024-ի օգոստոսի 1-ին վարչապետ Նիկոլ Փաշինյանը հայտարարել էր, որ իր հանձնարարությամբ ԱՆԻՖ-ում տեղի ունեցած ձախողումների հարցով ուսումնասիրություն է սկսվել, և այդ փաստի առթիվ հարուցված քրեական գործ կա։ Նշենք, որ Fly Arna ավիաընկերությունը, որն այլևս չի գործում, Air Arabia ավիաընկերության և ԱՆԻՖ-ի կողմից էր հիմնադրվել։
ԶԼՄ-ներն «ընկերության ձախողումը կապել էին Երևանի քաղաքապետ Տիգրան Ավինյանի հետ, քանի որ նա միջնորդ էր հանդիսացել, որպեսզի ընկերությունը թռիչքներ իրականացնի Հայաստանում»:
Ավինյանը 2019-2023 թվականներին ԱՆԻՖ-ի տնօրենների խորհրդի նախագահն էր։ ԱՆԻՖ-ում չարաշահումների, իր կողմից պարտականությունները չկատարելու մեղադրանքներին անդրադառնալով՝ նա հերքել էր դրանք՝ նշելով, որ ԱՆԻՖ-ը ճիշտ է կատարել առաջադրված խնդիրները։
Ապրիլին Ավինյանը հայտարարել էր, որ իր հետ կապված իրավական գործընթաց չկա և չի կարող լինել՝ հերքելով տեղեկությունը, ըստ որի՝ ՀՀ գլխավոր դատախազ Աննա Վարդապետյանն ԱՆԻՖ-ի չարաշահումների գործով պատրաստվում է մեղադրանք առաջադրել իրեն։
